Жил бүрийн зургадугаар сарын 9-ны өдрийг “Дэлхийн Итгэмжлэлийн өдөр” болгон тунхаглаж, Олон улсын итгэмжлэлийн форум (IAF), Олон улсын лаборатори итгэмжлэлийн хамтын ажиллагааны байгууллага (ILAC)-аас итгэмжлэлийн үйл ажиллагааны ач холбогдлыг таниулах нэгэн сэдвийн дор тэмдэглэн өнгөрүүлдэг. Боловсролын Магадлан Итгэмжлэх Үндэсний Зөвлөл “Дэлхийн итгэмжлэлийн өдөр”-ийг Монгол улсад үйл ажиллагаа явуулж буй  итгэмжлэлийн болон магадлан итгэмжлэлийн байгууллагуудтайгаа хамтран гурав дахь жилдээ тэмдэглэж байна. “Дэлхийн итгэмжлэлийн өдөр”-ийг “Шинэ үе ба жижиг дунд үйлдвэрлэлийн ирээдүй” уриан дор тэмдэглэж байгаа бөгөөд бидний хувьд энэхүү уриатай уялдуулан “Суралцахуйн үр дүн-Хөдөлмөрийн зах зээл” сэдвээр симпозиум зохион байгуулж,  “Суралцахуйн үр дүн ба хөдөлмөрийн зах зээл”, “Хөдөлмөрийн зах зээлийн ажиллах хүчний эрэлт, хомсдол судалгааны үр дүн”, “Хиймэл оюун ухаан ба ирээдүйн хөдөлмөрийн зах зээл”  зэрэг сэдвээр илтгэл  тавьж, Монгол улсын боловсролын салбар, хөдөлмөрийн зах зээлийн уялдаа холбоо, тулгамдаж буй асуудал, ирээдүйн чиг хандлагын талаар хэлэлцүүлэг өрнүүллээ. Энэхүү симпозиумд ажил олгогч, БМИҮЗ-ийн магадлан итгэмжлэлийн комиссын дарга, гишүүд, шинжээчдийн төлөөлөл, их, дээд сургуулиудын удирдлага, багш нарын төлөөллөөс бүрдсэн нийт 100 гаруй хүн хамрагдаж, илтгэлтэй холбоотой асуулт асууж, санал бодлоо солилцов.