Эрдэнэс Тавантолгой компанийн дэд бүтцийн төсөл, нүүрс тээвэрлэлтийн ажлыг гүйцэтгэж буй Хятадын хөрөнгө оруулалттай TTJVCO компанийн монгол ажилчид цалингаа нэмүүлэх шаардлага тавьж, ажил хаялт зарласан байнa.

Зургадугаар сарын 10-нд тус компанийн Өмнөговь аймагт ажиллаж буй 100 гаруй монгол уурхайчин ажил хаялт эхлүүлж, цалингаа 30 хувиар нэмэгдүүлэхийг шаарджээ. Ажилчдын зүгээс, шинэчлэгдсэн Хөдөлмөрийн тухай хуулиар 2025 оны нэгдүгээр сараас эхлэн цалин, хөлсийг инфляц болон амьжиргааны өртөгтэй уялдуулан нэмэх зохицуулалт үйлчилж эхэлсэн ч TTJVCO компанийн зүгээс энэ нэмэгдлийг хэрэгжүүлээгүй гэж үзэж байгаа ажээ. Тус компани ажилтан Г.Хоролмаа “Бид хуулийн дагуу цалин нэмэгдэх ёстой гэдгээ мэдэж байна. Гэтэл компанийн зүгээс ямар ч өөрчлөлт хийгээгүй. Хятадууд илүү цагийн мөнгөө авдаг ч бид огт авч чаддаггүй. Шударга бус байдал газар авсаар байна” гэв. Ажилчдын хэлснээр, хятад ажилчидтай харьцуулахад илүү бага цалин, илүү цагийн нөхөн олговоргүй байдал, нийгмийн баталгааны дутагдал зэрэг нь ажил хаялт зарлахад хүргэсэн гол шалтгаан болжээ. Энэ нөхцөл байдал нь Эрдэнэс Тавантолгой компанийн бусад гэрээт компаниуд ажилчдынхаа цалинг тодорхой хувиар нэмэгдүүлээд байхад зөвхөн TTJVCO компанид нэмэгдэл хийгдээгүй ажээ. Одоогийн байдлаар компанийн удирдлагууд албан ёсны тайлбар хийгээгүй бөгөөд уурхайн зарим хэсэгт тээвэр болон дэд бүтцийн үйл ажиллагаа саарч, олборлолтын хуваарьт тасалдал үүсээд байна. Хөдөлмөрийн хяналт, зохицуулалтын байгууллагууд нөхцөл байдалд хяналт тавьж эхэлсэн эсэх нь тодорхойгүй байгаа юм.