Бурхан багшийн их дүйчин өдөр зуны тэргүүн сарын шинийн 15-н буюу 2025 оны зургадугаар сарын 11-ний Лхагва гарагт тохионо. Буддын шашинтнууд олноор амьдардаг улс орнуудад уг өдрийг нийтээр тэмдэглэх баяр болгон амрахаас гадна өөр олон улсад янз бүрийн хэлбэрээр тэмдэглэн өнгөрүүлдэг. Монгол Улсад 1992 оноос хойш албан ёсоор тэмдэглэх болсон ба 2019 оноос бүх нийтийн амралтын өдөр болгон хуульчилсан билээ. Дүйчин гэдэг нь бурхны бодь хутгийг олсон, нирваан дүрийг үзүүлсэн өдөр хэмээн толь бичигт тайлбарлажээ. Тухайн өдөр хэрүүл тэмцэл хийх, хулгай хийх, амьтны амь таслах, бусдыг доромжлон гүтгэх зэрэг үйлийг цээрлэдэг байна. Энэ өдөр сүм хийдэд очиж ном сонсох, маань унших, буян үйлдэх, зул өргөх, бурхан шүтээнд хүндэтгэл үзүүлэх зэрэг зан үйлийг хийдэг.

Бурхан багшийн их дүйчин өдрөөр Улаанбаатар хотод болох үйл ажиллагаа:

04:00 “МБТШ Гандантэгчэнлин хийд” хөтөлбөр

              Тэгчэнсожин нэг өдрийн сахил хүртээнэ

              Бурхан багшийн чого хурна

09:00 Их дүйчин өдрийн нээлт

              Бурхан багшийн тахил өргөлийн үйл ажиллагаа

              Тэргүүн их хамба ламын мэндчилгээ

              Монгол Улсын Ерөнхийлөгчийн мэндчилгээ

              Олон улсын Бурханы шашинтнуудын мэндчилгээ

11:30 Сүхбаатарын талбайн “Buddha Festival” хөтөлбөр

             Нээлтийн ёслол

             Ардын урлагийн тоглолт

             Бясалгалын хөтөлбөр

             Хүрээ цам

21:00 Хүндэтгэлийн загсаал

            Сүхбаатарын талбайгаас МБТШ Гандантэгчэнлин хийд чиглэлд

22:00 Хаалтын ёслол

             Маани татах

            Ерөөл хурна

Бурхан багшийн их дүйчин өдрийн ач холбогдол:

Энэ өдөр тохиолддог олон талт үйл ажиллагаа, хөтөлбөрүүд нь хүний сэтгэлийн ариуслыг эрэлхийлэх, амьдралын зорилго, чиг хандлагаа зөв тийш чиглүүлэхэд чиглэсэн байдаг. Түүнчлэн олон нийтийг хамарсан сайн үйлс, хүмүүнлэгийн ажил зохион байгуулагддаг нь нийгмийн сайн сайхны төлөөх хамтын ухамсрыг төлөвшүүлэхэд онцгой нөлөөтэй юм. Иймд Бурхан багшийн их дүйчин өдөр бол өнгөрсөн цагийн гэгээн сургаалаас урам авч, өнөөгийн амьдралдаа оюунлаг өөрчлөлт хийх гэгээрлийн хором мөч билээ.