Монгол Ардын Намын (МАН) Бага хурал өнөөдөр хуралдаж, дараагийн Ерөнхий сайдад нэр дэвшигчийг тодруулахаар санал хураалтыг эхлүүллээ. МАН-ын Удирдах зөвлөлөөс Ерөнхийлөгчийн Тамгын газрын дарга Г.Занданшатар-ыг нэр дэвшүүлсэн бол хурлын заалнаас УИХ-ын гишүүн Г.Тэмүүлэн өөрийн нэрийг дэвшүүлсэн байна. Энэ үеэр Гадаад харилцааны сайд асан Б.Батцэцэг сэтгүүлчдэд мэдээлэл өглөө. Тэрбээр “Саналаа хоёрдугаарт өгч гараад ирж байна. Бага хурлын уур амьсгал нээлттэй, харилцан ойлголцсон, найрсаг байдалтай байна. Намын эв нэгдэл өмнө нь биднийг амжилтад хүргэж ирсэн гэдгийг гишүүд ухамсарлаж байгаа. Хэвлэл мэдээлэл, сошиал ертөнцөд бий болсон тулаан мэт уур амьсгал, бодит бус мэдээлэлд болгоомжтой, эрүүл хандлагаар хандаж байна. Энэ хурлын явцад анзаарагдсан. Нэр дэвшигчдээс 39 хүн асуулт асууж, тэд тус бүр 30-40 минут хариулт өгсөн. Маш тодорхой, бодит хариултууд өгсөн нь гишүүдэд таалагдсан байх. Миний хувьд ч ойлгомжтой, бодлогын түвшинд хандсан хариултууд гэж харсан. Хоёр нэр дэвшигч хоёулаа унасан эдийн засгаа хэрхэн богино хугацаанд сэргээх, бүтээмжийг нэмэгдүүлэх, мега төслүүдээ ач холбогдлоор нь эрэмбэлэн хэрэгжүүлэх, төсвийн тодотгол хийх шаардлагатай гэж үзсэн. Дараагийн Засгийн газар цомхон бүтэцтэй, илүү үр дүнтэй ажиллах ёстой гэдэгт санал нэгдэж байгаа. Эвслийн Засгийн газар байгуулах эсэх нь хувь хүний биш, намын шийдэх асуудал. АН өмнөх шийдвэрээр гарсан, мөн дахин хамтрахгүй гэсэн байр суурьтай байгаа. Бусад намуудтай зөвшилцөх эсэхийг Бага хурлын шийдвэрээр тодорхой болгоно. Харин миний хувьд, хэрэв дараагийн Ерөнхий сайд санал тавивал Гадаад харилцааны сайдын ажлаа үргэлжлүүлэхэд бэлэн байна” гэв