Засгийн газраас гарсан шийдвэрүүдийг танилцуулж байна. Энэ үеэр Сангийн сайд Б.Жавхлан мэдээлэл өглөө

Тэрбээр “Хамтарсан Засгийн газрын ажилласан хугацаанд бид хэд хэдэн салбарт томоохон эрх зүйн өөрчлөлт хийхээр бэлтгэл ажил хангаж ирсэн. Үүний нэг хэсэг болох татварын багц хуулийнд өөрчлөлт оруулах тогтолцооны өөрчлөлт. Энэ удаагийн татварын өөрчлөлт нь 2019 онд өөрчлөлт орсноос хойш даруй таван жилийн дараа ойрхон өөрчлөгдөж байгаагаараа онцлог. Ингэснээр татварын хуулийнд дөрөв дэх удаагаа томоохон өөрчлөлт орж байна. Татварын ерөнхий хууль, Хувь хүний орлогын албан татварын тухай хууль, ААН-ийн орлогын албан татварын тухай хууль, НӨАТ-ын тухай хууль гэсэн дөрвөн хуульд гол өөрчлөлт орж байгаа. Мөн дагаад Гаалийн тухай хуульд өөрчлөлт орно. Хуулиа өргөн барихад бэлэн боллоо. Хуулийн өөрчлөлтийн бэлдэх явцад өргөн бүрэлдэхүүнтэй хэлэлцүүлэг  хийсэн, нийт 13 мянга гаруй татвар төлөгч, 150 гаруй уулзалт хийж, цахимаар нээлттэй санал авсан мөн УИХ-ын ажлын хэсгээс хүмүүс гарч хамтран ажилласан. 

                 Иргэдийн сарын 500 мянган төгрөг хүртэлх худалдан авалтыг 100 хувь, 800 мянга хүртэлх худалдан авалтын 50 хувь, 800 мянган төгрөгөөс дээших худалдан авалтыг хуучин шигээ 20 хувиар НӨАТ-аас хөнгөлөгдөнө. Энэ нь 500 мянга хүртэлх худалдан авалт НӨАТ-аас бүрэн чөлөөлөгдөхөөр, НӨАТ уншуулж худалдан авалт хийж байгаа иргэдийн 51 хувь нь бүрэн чөлөөлөгдөнө гэсэн үг. Нийт иргэдийн 50-100 хувь нь НӨАТ-аас бүрэн чөлөөлөгдөнө гэж ойлгож болно. Жишээ нь, таван ам бүлтэй өрх өрхийнхөө гишүүн бүр дээр худалдан авалтаа хуваахаар 500, 500 мянган төгрөг төлж байгаа учраас тухайн гэр бүл НӨАТ-аас бүрэн чөлөөлөгдөж байгаа юм. 

                Хөдөлмөр эрхэлж буй бүх иргэдийн хөдөлмөрийн хөлсний доод хэмжээтэй тэнцэх буюу сарын 800 мянган төгрөг хүртэлх орлого нь  100 хувь хөнгөлөгдөнө, татвар төлөхгүй гэсэн үг. Ингэснээр цалингаасаа татвар төлдөг нийт иргэдийн 45 хувь нь татвараас бүрэн чөлөөлөгдөж байгаа юм. Өөрөөр хэлбэл сая төгрөгийн орлоготой иргэн 800 мянган төгрөг дээр нь татвар төлөхгүй, 200 мянган төгрөгөөсөө татвар төлөх юм.

                Бүх нийтээрээ тэгш, шударга татвар төлөх эрх зүйн орчныг бүрдүүлэх хүрээнд үйл ажиллагааны орлогыг шатлалд хамруулах, хялбаршуулсан горимоор тайлагнах босго дүнг 400 сая төгрөг болгож, үйл ажиллагааны орлоготой иргэдэд татварын хөнгөлөлт үзүүлнэ.

              Мөн Улаанбаатар хотоос орон нутагт шилжин суух иргэдийн амьдрах таатай орчныг бүрдүүлэх эрчим хүчний хэмнэлттэй, хүртээмжтэй, ногоон барилгыг нэмэгдүүлэхэд 15 сая төгрөг хүртэлх татварын хөнгөлөлтөд хамрагдана.

              Татвар төлөгчийн татвар төлөх, тайлагнах үйл ажиллагааг хялбаршуулах, үүсэж болзошгүй татварын эрсдэлээс урьдчилан сэргийлэх зорилгоор татварын албанаас тайлангийн төслийг урьдчилан бэлтгэн хүргэдэг болно. 

              ААН-ийн 25 хувиар татвар төлөх босгыг зургаан тэрбум төгрөг байсныг 10 тэрбум төгрөг болгон нэмэгдүүлж, 6-10 тэрбум төгрөгийн ашгийн татварыг 15 хувь болгож бууруулна.

              Баримтгүй худалдан авалтыг бэлэн бусаар хийсэн тохиолдолд үнийг дүнд НӨАТ шингэсэн гэж үзэж, хасагдах эрхийг нээнэ.

              Жижиг, дунд ААН-ийг дэмжих хүрээнд нэг хувиар татвар төлөх орлогын босгыг 1.5 тэрбум байсныг 2,5 тэрбум болгон нэмэгдүүлж, гурван жил хөнгөлнө.

             Санхүүгийн хүндрэлтэй нөхцөл байдалд орж, татварын өртэй татвар төлөгчийн банкны дахь дансыг бүхэлд хаах бус 80 хувийг битүүмжилж, үйл ажиллагаагаа хэвийн явуулах нөхцөлийг бүрдүүлнэ.

Эдгээр өөрчлөлтийг баталснаар төсөвт дөрөв орчим их наяд төгрөгийн нөлөө үзүүлнэ. Тиймээс нэг жилийн төсөв дээр ийм их ачаалал авах боломжгүй. 2026, 2027 он дамжуулан хэрэгжүүлэхээр батлуулна" гэв.