Цагдаагийн алба хаагчдад эрүүдэн шүүлгэсэн иргэн амиа алдсан гэх харамсалтай хэрэг гарсан. Тодруулбал, Баянгол дүүргийн Эрүүгийн хэлтсийн алба хаагчид гар утасны хулгайн хэрэгт сэжиглэгдэж байсан иргэнийг байцаах үедээ эрүүдэн шүүж, 461 дүгээр хорих ангид гурван сар хорьжээ. Талийгаачийн бие долдугаар сарын 22-нд бие нь муудаж Гуравдугаар эмнэлэгт хүргэгдэж, эмчүүлж байхдаа нас баржээ. Талийгаачийн ар гэрийнхэн хэргийн талаар мэдээлэл хийлээ. Энэ үеэр талийгаач О-ийн эгч “Дүүг минь гэмт хэрэгт холбогдуулан шалгаж байсан. Түүнээс биш гэмт хэрэгтэн байгаагүй. Шүүхээр эцэслэгдэн шийдэгдээгүй байсан гэдгийг онцолж хэлмээр байна. Тийм учраас дүүг минь гадуур шалгах боломжтой байсан. Энэ талаар өргөдөл гомдол гаргасан. Дүүтэй минь хамт явсан хүн нь гар утас хулгайлснаас болж манай дүүг Баянгол дүүргийн цагдаа нар шалгаж, мэдүүлэг авах журмаар зодож тамалсан. Дүүг минь тамласан найман хүн бий. Тэдний зургаа нь дүүг минь зодсон болох нь тогтоогдсон. Тийм учраас бид дээрх нэр бүхий цагдаа нарыг АТГ-т өгсөн. Түүнээс болж дүүг минь дарамталж, зодох нь улам нэмэгдэж, дүү минь хэлмэгдсэн юм билээ. АТГ-т байцаалт өгөхөөр явж байхад нь Баянгол дүүргийн хоёр цагдаа барьж аваад Чингэлтэй дүүргийн цагдаагийн газар руу шилжүүлсэн. Тэндээс 461 дүгээр хорих анги руу шилжүүлж, гурван сар баривчлагдсан. Долдугаар сарын 11-нд дүүгийн бие муудаж, хорих ангийн эмнэлэгт хэвтсэн юм билээ. Харин биеийн байдал нь улам дордож, Гуравдугаар эмнэлэгт ирэхэд нь байцаагч болон прокурор ч мэдээгүй ирсэн. Тиймээс бид хуулийн бүх байгууллагад гомдолтой байна” гэв.