Үндэсний сэтгүүл зүйн салбар үүсэж, хөгжсөний 111 жилийн ойн баярын өдөр МНСЭ-ээс салбартаа тэргүүлэн ажилласан сэтгүүлч, редакторуудад төрийн болон салбарын нэрэмжит шагнал гардууллаа. Энэ үеэр Эргэлт.мн мэдээллийн сайтын Ерөнхий редактор Б.Энхмарт Монголын сэтгүүл зүйн салбарыг үүсгэн байгуулагч, соён гэгээрүүлэгч Ж.Цэвээний нэрэмжит шагнал хүртлээ.

      Редактор Б.Энхмарт нь 2009 онд “Өнөөдөр” сонины Эрэн сурвалжлах шуурхайн мэдээллийн албанаас сэтгүүлчийн гараагаа эхлүүлж, 2015 оноос “Үндэсний шуудан” сонины Эрэн сурвалжлах албаны сэтгүүлч, Хариуцлагатай нарийн бичгийн дарга, 2020 оноос Эргэлт.мн мэдээллийн сайтын Ерөнхий редактораар ажиллаж байна.

     Тэрбээр Монголын сэтгүүл зүйн шилдгийн шилдэг бүтээлд олгодог Балдорж шагналын Гран приг 2017 онд “Нулимстай бөхөн” цуврал сурвалжилгаараа хүртэж байсан юм.

       Б.Энхмарт нь 2021 онд Эргэлт.мн мэдээллийн сайтаас эрхлэн гаргасан “Эргэлтийн номын сан” цуврал сэтгүүл зүйн 10 боть ном,  Монголын анхны эрэн сурвалжлах Эргэлт сэтгүүлийн гурван дугаарын Ерөнхий редактораар ажилласан.

       Түүнчлэн Эргэлт.мн мэдээллийн сайтаас эрхлэн гаргасан “Эргэлт сонин”, “Монголын шилдэг нийтлэл” эрдэм шинжилгээний, судалгааны төв ТББ-аас эрхлэн гаргадаг “Монголын шилдэг нийтлэл цувралын 74 дэх” ботийн редактораар ажиллажээ. Мөн тэрбээр “Хөх хомоол дээр суусан чогчиго”, “Миний тэмдэглэл”, “Дэндүү үнэнч чи минь” хэмээх сэтгүүл зүйн гурван ном Эргэлт.мн мэдээлийн сайтын сэтгүүлчдийн хамтран гаргасан "Дөрвөн өөр намар" яруу найргийн түүврээ уншигч олондоо хүргэсэн юм.

             Түүний “Өвөөгүй наадам”, “Дэндүү үнэнч чи минь”, “Нулимстай бөхөн”, “Бид болон Монголын тал нутаг чамд хайртай”, “Цас амьдралын зудан дундуур” “Газар хөдлөхөөс хэдхэн цагийн өмнө”, "П.Батхуяг: "Хойд Солонгос" шиг өөрийнхөөрөө", "Өнө мөнхийн хөх уул", "Дарма Батбаяр: Хүн бүр адилхан сэтгэхүйтэй болно гэдэг эвлэрч болшгүй зүйл" тэргүүтэй сэтгүүл зүйн сурвалжилга, нийтлэл, ярилцлага нь уншигчдын хүндэтгэлийг хүлээсэн билээ.