Эрүүл мэндийн яамнаас коронавирусийн тархалтын талаар ээлжит мэдээлэл хийлээ.

Энэ үеэр ХӨСҮТ-ийн Тандалт, судалгааны албаны дарга А. Амбасэлмаа “арванхоёрдугаар сарын 10-ны өдөр улсын хэмжээнд 8574 хүнд PSR  шинжилгээ хийхэд Сэлэнгэ аймагт ойрын хавьтлын таван  хүнээс халдвар илэрлээ. Тэднээс хоёр, гурван удаагийн шинжилгээ авахад халдвар илэрсэн байна. Ингээд Сэлэнгэ аймагт 213 тохиолдол батлагдлаа. Улаанбаатар хот, Орхон, Дархан-Уул, Говьсүмбэр, Архангай, Дорноговь аймагт өнгөрсөн 24 цагийн хугацаанд халдвар илрээгүй байна. Манай улсад хэмжээнд нийт 912 тохиолдол бүртгэгдэж, дотоодын халдвар 459 болсон байна. Үүнээс 384 хүн эдгэрч, 516 хүн эмчлэгдэж байна. Тэдгээрийн биеийн байдал хөнгөн 438, хүндэвтэр 75, хүнд тав, маш хүнд нэг байна.

Амьсгалын замын халдвар томуу, томуу төст өвчний дэгдэлттэй коронавирусийн халдвар давхцаж байгаа тул ямар нэгэн амьсгалын замын шинж тэмдэг илэрвэл харьяа эрүүл мэндийн төвд хандах хэрэгтэй. Өнөөдрийн байдлаар аж ахуйн нэгжүүд үйл ажиллагаагаа нээж байна. Гэхдээ мэргэжлийн байгууллагын зөвлөмжийг дагаж, эрүүл мэндийн тандалт хийх, ямар нэгэн эмнэлзүйн шинж тэмдэг илэрвэл буцаах, гэрээр ажиллах боломжтой бол цахимаар ажиллах зэрэг хүний бөөгнөрөл үүсгэхгүй байхад онцгой анхаарах хэрэгтэй" гэлээ.