БНХАУ-ын Гадаад хэргийн яамнаас Монгол Улсад шинэ коронавируст халдварын цар тахалтай тэмцэхэд зориулж дөрвөн сая юань буюу 1.7 тэрбум төгрөгийн үнэ бүхий Полимеразын гинжин урвалын анализатор машин, вирусын нуклейн хүчлийг ялгагч аппарат тус бүр дөрвөн ширхэгийг тэдгээрийн оношлуур, ялгагч багцуудын хамт хандивлаж байгааг БНХАУ-аас Монгол Улсад суугаа Онц бөгөөд бүрэн эрхт Элчин сайд Цай Вэньруй хүлээлгэн өглөө. 

Эдгээр тоног төхөөрөмжийг хүлээн авах үеэр Монгол Улсын Засгийн газрын гишүүн, Эрүүл мэндийн сайд Т.Мөнхсайхан "КОВИД-19 халдвар тархаж эхэлсэн үеэс хоёр улс харилцан бие биедээ тусалж дэмжиж ирсэн бөгөөд энэ удаагийн тусламж нь эдгээр хандив тусламжийн томоохон хэсэг болохыг онцоллоо. Дээрх оношилгооны аппаратуудыг Халдварт өвчин судлалын үндэсний төв болон Зоонозын өвчин судлалын үндэсний төвд тус тус хүлээлгэн өгч одоогоор нийт 100 мянга  гаруй хүнд шинжилгээ хийсэн болохыг мэдэгдлээ. 

Элчин сайд Цай Вэньруй хэлэхдээ БНХАУ-ын Засгийн газраас шаардлагатай лабораторийн тоног төхөөрөмж, эмнэлгийн болон хувийн хамгаалах хэрэгслийн багц тусламжийг Монгол Улсад үзүүлж байгаа ба энэ удаа дөрөв дэх ээлжийн тусламжийг хүлээлгэн өгч байгаагаа мэдэгдээд Монгол Улсын Засгийн газраас КОВИД-19 халдварын цар тахлын эсрэг авч буй арга хэмжээ, хийж хэрэгжүүлж буй үйл ажиллагаанууд үр дүнтэй байгааг онцлов. Мөн БНХАУ-д халдварын цар тахал дэгдэх үед Монгол Улсын төр засаг, ард иргэд сэтгэл санааны дэмжлэг үзүүлэхийн зэрэгцээ 30 мянган хонь бэлэглэсэн явдалд Хятадын ард түмэн их баяртай байгааг мэдэгдээд цаашид хамтын хүчээр цар тахлыг ялан дийлнэ гэдэгт итгэлтэй байна гэлээ.