Монголын Үндэсний Олон нийтийн Радио Телевизийн үүдэнд телевизийн уран бүтээлчид, ажилчид, Үйлдвэрчний эвлэлийн гишүүд мөн Төрийн бус байгууллагын ажилчид гэр барьж эсэргүүцэл илэрхийлж байна. Тус  эсэргүүцлийн талаар  МҮОНРТ-ийн найруулагч Ц.Нямбаяраас тодруулахад “ Бид Л.Нинжжамц даргатай холбоотой асуудлаар гурван сар эсэргүүцэл илэрхийлж байна. Өнөөдөр Үндэсний зөвлөлийн долоон гишүүний хугацаа дуусаж, шинэ гишүүд сонгоно. Тэр хүмүүс дотор манай ажилчдыг огцруулахыг шаардаж байсан Ц.Батцэнгэл, Б.Ганболд нар Байнгын хорооны хурлаар дэмжигдсэн.

Хэрвээ өнөөдөр Чуулганы хуралдаанаар тэдгээр хүмүүс сонгогдчих юм бол бид суулт хийнэ. Хөл хориотой байгаа ч гэсэн хуулийн дагуу жагсана. Хамт олны зөвлөлийн 13 гишүүн, Үйлдвэрчний эвлэлийн гишүүд мөн төрийн бус байгууллагын ажилчид ирэх магадлалтай байна.  Нэг намын харьяалалтай хүмүүсийг буцааж захирлаар томилохыг бид зөвшөөрөхгүй.  Бид гурван сарын хугацаанд  шударга бусын төлөө, байгууллагын мөнгө санхүүг үргүй зарсаны төлөө тэмцсэн. Мөн бид нарыг өчигдөр лайв хийсэн, суулт хийх гэж гэр барих гэж байна гэсэн шалтгаанаар  зарим ажилчдыг телевиз рүү оруулахгүй байна” гэлээ.