Мөрдөн шалгах хэлтсийн хоёрдугаар албаны дарга ахлах комиссар Б.Батбилэг Боловсролын зээлийн сангийн хэргийг хэрхэн шалгах талаар мэдээлэл өглөө. Тэрбээр “Цагдаагийн байгууллагаас Боловсролын зээлийн сангийн талаар цахим орчинд тарж буй гэмт хэргийн шинжтэй үйлдлүүд байна уу үгүй юу гэдгийг шалгаж байна. Эрүүгийн цагдаагийн албанаас шалгалтын баг гарсан. Шалгалтын явцад улс төрийн нөлөө бүхий хүмүүс боловсролын зээлийн сангаас хууль бусаар зээл авч, албан тушаалын байдлаа урвуулан ашиглаж, гэмт хэрэгт холбогдсон эсэхийг хуулиар шалгана” гэлээ.

      Мөн 1992 оноос олгосон Боловсролын зээлийн санг шалгаж, зөрчигдсөн эрхийг сэргээж, тус санг хохиролгүй болгож, эргэн төлүүлнэ. Боловсролын зээлийн сантай холбоотой 800 гаруй хүнд хэрэг бүртгэл нээж, шалгаж байна. Иргэд, аж ахуйн нэгж байгууллагаас ирүүлсэн гомдол мэдээллийн дагуу шалгалтын ажиллагааг үргэлжлүүлж байгаа. Хоёрдугаарт, АТГ-аас гүйцэтгэх ажил хийдэг. Гэмт хэргийг хэн, хэзээ, хаана  үйлдсэн байна вэ гэдгийг шалгахаас гадна албан тушаалын байдлаа урвуулан ашигласан байж болзошгүй хүмүүсийг давхар шалгана гэдгийг албаны хүмүүс онцолсон юм.