Боловсролын зээлийн сангийн талаар Боловсрол шинжлэх ухааны сайд Л.Энх-Амгалан мэдээлэл өглөө. Тэрбээр “Өнөөдрийн байдлаар Боловсролын зээлийн сангаар 1.2 сая хүүхэд суралцсан байна. Үүнээс 3000 нь гаднын улс оронд 1997 оноос хойш суралцсан гэх мэдээлэл бий. Өнөөдрийг хүртэл нэг их наяд төгрөгийг сургалтын зээлд зарцуулсан байна. Иймд иргэд буруу ойлголттой байгаа. Зөвхөн улстөрчийн хүүхдүүд тус сангаас зээл аваагүй. Бүх мэдээллийг олон нийтэд ил болгосноор мэдээллийг гуйвуулах, буруугаар ашиглаж байна. МАН-ын Нарийн бичгийн дарга О.Батнайрамдал олон нийтэд “Нийт олгосон зээлийн 99 хувийг эргэн төлөөгүй. 90 хувийг эрх мэдэлтэй улстөрчдийн хүүхдүүд эзэлсэн” гэх мэт худал мэдээлэл тараасан. Үүнд тайлбар хэлье.

    Боловсролын зээлийн сангийн гадаад зээлд 2288 хүн 220.8 тэрбум төгрөгөөр суралцсан байна. Үүнээс баклаврт 101.4, магистр, докторын сургалтад 119.4 тэрбум төгрөг зарцуулсан байгаа юм. Тус сангаас зээл авахад үл хөдлөх хөрөнгөөр баталгааждаг. Одоогийн байдлаар 123 тэрбум төгрөгийн үнэлгээ бүхий 1244 барьцаа хөрөнгө бий. Миний төрсөн дүү 2004 онд ОХУ-ын Цагдаагийн академид 12 мянган долларын зээлээр суралцсан. Тухайн үед би бизнес эрхлэгч байсан болохоор ямар нэгэн байдлаар нөлөөлж чадаагүй. Дүү минь одоо Булган аймгийн цагдаагийн даргаар ажилладаг. Мөн УИХ-ын гишүүн Ш.Адьшаагийн хүүхдэ зээлээр суралцсан нь үнэн юм билээ. Харин Ч.Даваасүрэнгийн хүүхэд тэтгэлэгээр суралцаж дэлхийн шилдэг 100 сургуульд тэнцэж байсан юм байна лээ” гэв.