УОК-оос цаг үеийн асуудалтай холбоотойгоор мэдээлэл хийлээ. Энэ үеэр ХӨСҮТ-ийн захирал Л.Баттөр “Агаар муутай орчинд амны хаалтгүй үйлчлүүлэх нь халдварын тархалтыг нэмэгдүүлэх эрсдэлтэй. ЭМЯ-ны дэргэд эрдэмтэн, судлаачид тооцоолол хийж байгаа. ХӨСҮТ-ийн судлаач, мэрэгжилтнүүд мөн халдварын нөхцөл байдал, цаашид ямар хэмжээнд хүрэх вэ гэх тооцоолол хийж буй. Тэдний зүгээс халдварын тархалт зургадугаар сарын 15-наас  буурна гэх тооцооололтой байсан. Гэвч нөхцөл байдал эрдэмтдийн тооцоолсноор биш байгааг бид бүгд мэдэж байна. Үүнд олон хүчин зүйлс нөлөөлж байна гэж бид таамаглаж байгаа. Аль нэг талыг нь давуу байдлаар ноцтойгоор нөлөөлж байна гэж хэлэхэд эрт байна. Вакцин, хөл хориотой холбоотой эерэг, сайн талын мэдээллийг өгөхөөр иргэд маань хэтэрхий тайвширдаг. Сөрөг талыг нь хэлэхээр “Айдастай байлгах менежмент хэрэглээд байна” гэх байдлаар ханддаг. Халдвар тархах нөхцөл нэмэгдүүлж буй хэд хэдэн хүчин зүйл дотор “Вакцины бүрэн тунд хамрагдаад 14 хоносон л бол халдвар авахгүй” гэх ойлголт байна.

Ер нь дархлаажуулалтын үйл ажиллагаа эхэлж байх үед вакцины бүрэн тунд хамрагдсан ч гэсэн дархлал бүрэн тогтох болоогүй, дархлал тогтсон ч гэлээ халдвар авах эрсдэлтэй гэдгийг мэдээлсээр ирсэн. Иймд халдвар хамгааллын дэглэмээ байнга сахих тухайд зөвлөж байгаа. Нөгөөтэйгүүр, орон нутгийн зам тавдугаар сарын 22-ноос нээгдсэнтэй холбоотойгоор амралт зугаалгаар орон нутаг руу зорчих зэрэг бусад үйл ажиллагаа идэвхжих хандлагатай байгаа нь халдвар тархах нэг хүчин зүйл болж байна.

Сонгуулийн үйл ажиллагааг зохион байгуулахад мэргэжлийн байгууллагын зүгээс халдвар хамгааллын дэглэмээ барих, түүнийг нарийн сайн зохион байгуулах тал дээр зөвлөмж өгсөн. Сонгуулийн үйл ажиллагаатай зэрэгцэн Сүхбаатарын талбайд шагнал олгох арга хэмжээ олон хоног тасралтгүй үргэлжилсэн. Үүнийг та бүгд мэдэж байгаа байх. Шагнал авахдаа халдвар авдаггүй юмаа гэхэд шагналаа мялаах, олон нийтийн арга хэмжээ зохион байгуулах, гэртээ очоод дайллага хийх зэрэг нь халдвар тархахад нөлөөлсөн байхыг үгүйсгэхгүй” гэв.