Нийслэлийн Мэргэжлийн хяналтын газраас (НМХГ) өчигдөр буюу зургадугаар сарын 15-нд худалдаа, үйлчилгээ эрхлэгч аж ахуйн нэгж байгууллагын үйл ажиллагаанд шөнийн хяналт хийжээ. Энэ талаар болон зургадугаар сарын 1-15-ныг хүртэлх хяналт шалгалтын талаар дэлгэрэнгүй мэдээлэл өглөө.

НМХГ-ын Эрүүл мэнд, боловсрол, соёлын хяналтын хэлтсийн дарга Д.Цэнд-Аюуш “НМХГ-аас давхардсан тоогоор 70428 газарт хяналт шалгалт хийсэн. Үүнийг төрлөөр нь задалбал, хүнсний худалдаа, үйлчилгээний 50526, хоол үйлдвэрлэлийн 8952,  хүнсний үйлдвэрлэл 955, хүнсний бус бараа бүтээгдэхүүний худалдаа 1189, эмийн сан 1800, ахуйн үйлчилгээний чиглэлээр 5363, чийрэгжүүлэлт, фитнес, иог 331, сургалтын төв 388, бассейн 433, зочид буудал 806, сайн 41, амралтын газар 34  нийт 70428 байгууллагад хяналт шалгалт хийсэн.

Хяналт шалгалтын явцад халдвар хамгааллын дэглэм, хүнсний аюулгүй байдал хангуулах талаар 17 төрлийн мэдэгдэл зөвлөмжийг 88 салбарт үйл ажиллагаа явуулдаг 35 мянган аж ахуйн нэгж байгууллагад хүргүүлсэн. Тодруулбал, халдвар хамгааллын дэглэм мөрдүүлээгүй, хүнсний аюулгүй байдал хангуулаагүй 7500 зөрчил илрүүлж, 4323 зөрчлийг арилгуулж, 98 аж ахуйн нэгж байгууллага, иргэнд улсын ахлах байцаагчийн зөвлөмж хүргүүлсэн. Илэрсэн зөрчилд үндэслэн 437 заалт бүхий улсын байцаагчийн албан шаардлагыг Бөмбөгөр, Хан талст, Дүнжингарав, Баянзүрх болон Натур прогресс компанийн худалдааны төв, Хан-Уул дүүрэгт Голомт банк, Golden gym, “Мөөнө” үсчин зэрэг 91 аж ахуйн нэгж байгууллага, иргэнд өгсөн. Мөн халдвар хамгааллын дэглэм мөрдүүлээгүй зөрчил гаргасан 201 этгээд, хувь хүнд нийт 104 сая 200 мянган төгрөгийн торгох шийтгэл ногдуулсан” гэв.