“Номын баяр”-ын арга хэмжээний үеэр ном зарж буй иргэнтэй цагдаагийн алба хаагч зүй бус харьцсан талаар нийгмийн сүлжээнд тархсан. Энэ талаар ЦЕГ-ын хэвлэлийн ажилтан, хошууч О.Эрдэнэхишигээс тодруулахад “Зохих зөвшөөрөлгүй ном худалдаалж байсан гэх иргэнд зохион байгуулагчдын зүгээс хууль ёсны шаардлага тавихад биелүүлэхээс татгалзаж олон нийтийн газар бусдыг үл хүндэтгэж, маргаан үүсгэж байна гэх дуудлага мэдээллийг 2021 оны зургадугаар сарын 13-ны өдөр 18.00 цагт Сүхбаатар дүүрэг дэх цагдаагийн нэгдүгээр хэлтэст ирүүлсэн. Сүхбаатарын талбай орчимд эргүүлийн үүрэг гүйцэтгэж байсан цагдаагийн алба хаагчид дуудлагын дагуу очиж шалгахад 58 настай, эрэгтэй Т гэгч нь зохион байгуулагчдын тавьсан шаардлагыг биелүүлэхээс татгалзаж, маргаан үүсгэн газар сууж байсан тул цагдаагийн алба хаагчид гудамж талбай олон нийтийн газар иргэдийн амар тайван байдлыг алдагдуулахаас урьдчилан сэргийлж уг иргэнийг тухайн. газраас холдуулсан байна” гэлээ.