Хөгжлийн бэрхшээлтэй ажиглагч Х.Батчимэг сонгуулийн санал авах байрны хүртээмжийн талаар мэдээллээ.

      Монголын "Багш эцэг эхчүүд холбоо" ТББ-ын ажиглагч Х.Батчимэг “АНУ-ын хөгжлийн агентлаг, Бүгд найрамдах олон улсын хүрээлэнгээс Багш эцэг эхчүүд ТББ-тай хамтран "Хөгжлийн бэрхшээлтэй сонгогч иргэн" төслийг хэрэгжүүлж буй. Төслийн хүрээнд хөгжлийн бэрхшээлтэй 20 хүнийг сонгуулийн ажиглагчаар бэлдсэн. Сонгуулийн хугацаанд санал авах байрны дэд бүтэц ямар байгаа, хөгжлийн бэрхшээлтэй иргэдийн мэдээллийн хүртээмж болоод тэдэнд хандах хандлага ямар байгааг хөндлөнгөөс ажиглан судалж байна. Энэ дүгнэлтээ цааш нь олон улсын байгууллагад өгнө.

      Хөгжлийн бэрхшээлтэй иргэн өөрийн биеэр, ганцаараа саналаа өгөхөд хүндрэлтэй. Манай санал авах байрнууд ихэвчлэн хуучны дэд бүтэцгүй байранд байрладаг тул хөгжлийн бэрхшээлтэй иргэд эрхээ бүрэн эдэлж чадахгүй байна. Бид ийнхүү хөндлөнгөөс ажиглан оролцсоноор үүнийг сайжруулна гэж харж байна.

      Хөгжлийн бэрхшээлтэй иргэн зөөврийн хайрцгаар саналаа өгч болно гэдэг маш буруу хандлага. Бид бусдын л адил нийгмийн амьдралд биеэр оролцох ёстой. Орчны хүртээмжтэй байдал нь зөвхөн хөгжлийн бэрхшээлтэй иргэдэд зориулсан зүйл биш. Та бүхэн анзаарвал гудамжаар хүүхдээ тэрэгтэй түрээд явахад хэцүү. Хөгжлийн бэрхшээлтэй иргэнийг биеэр ирж өгөх нөхцөлөөр хангах хэрэгтэй. Орчныг нь бүрдүүлээд өгвөл хараа, сонсголын бэрхшээлтэй иргэд ажиглагчаар ажиллах бүрэн боломжтой” гэлээ.