Хуульч өмгөөлөгч А.Эрдэнэбилэг мэдээлэл хийлээ. Тэрбээр мэдээллийнхээ үеэр нэр бүхий 17 шүүгчийг Цагдаагийн ерөнхий газар, Авилгатай тэмцэх газар, Шүүх ерөнхий зөвлөлийн ёс зүйн хороонд өгч буйгаа хэлсэн юм. А.Эрдэнэбилэг хэлэхдээ "Монголын шүүхчид шударга бус шийдвэр гаргадаг. Энэ талаарх маш олон баримт надад бий. Үүнээс дурдвал Баянзүрх дүүргийн нутагт байрлах хуучнаар 7-р дэлгүүрийн байрыг хуурамч бичиг баримт бүрдүүлэн өмчилсөн хэрэг. Цагдаа болон прокуророос түрээслэх гэрээг өөрчлөн худалдан авах гэрээ болгож залилан хийж өөрийн болгосон гэсэн дүгнэлт гарсан байхад давж заалдах шүүх хуурамч бичиг баримтаар өмчлөгч болсон ч өмчлөх хүсэлтэй гээд өмчлөх эрхийг нь шилжүүлсэн байдаг. Энэ бол хууль бус шийдвэр. Уг нь шүүгчид хуулийн дагуу ажиллах ёстой хэмээн Үндсэн хуульд заасан байдаг. Гэтэл шүүхчид иргэний, эрүүгийн, захиргааны хэргүүд дээр шат, шатандаа хууль бус шийдвэр гаргасаар байна. Мөн ганц шүүгч ч гэлтгүй шинжээчид шударга бус дүгнэлт гаргадаг. Үүнтэй холбоотой баримт ч надад бий. Миний зүгээс монголын шүүх, хуулийн байгууллагыг шударга болгохыг зорьж явна. Шаардлага гарвал би долоо хоног бүр мэдээлэл хийж баримт гаргах болно." гэлээ.