ШУТИС-ийн харьяа Үйлдвэрлэл технологийн сургууль үйл ажиллагаа явуулаад өдгөө 70 жил болж байна. Тус сургуулийн барилгын насжилт дуусаж, 2016 онд актлан, шинэ сургууль барих зураг төсөл гаргасан. Гэтэл 2021 оны дөрөвдүгээр сарын 09-нд ШУТИС-ийн ТУЗ-ийн хурлаар тус сургуулийг нурааж, газар дээр нь Боловсролын үнэлгээний төв барихаар болжээ.

Энэ асуудлаар Үйлдвэрлэл, технологийн сургуулийн багш, доктор Р.Бадмаанямбуугаас тодруулахад “Манай сургуулийн барилга 1951 онд баригдсан. Өдгөө 70 жил болчихсон учраас ашиглалтын хугацаа нь дууссан. Яаралтай шинэчлэх шаардлагатай байгаа юм. Үүнээс үүдэн одоогоос таван жилийн өмнө сургуулийн удирдлагууд “Энэ газар дээрээ орчин үеийн судалгааны инноваци, мэдлэгийн төв байгуулъя” гэдэг санаачилга гаргаж, долоон давхар барилгын зураг төсөл гаргасан.

Гэтэл зураг төсөл, инженерийн шийдэл гээд бүх зүйл нь бэлэн болсон хойно ШУТИС-ийн Төлөөлөн удирдах зөвлөлийн дарга болсон Боловсролын дэд сайд Г.Ганбаяр гэж хүн будилаан үүсгээд байна. Уг нь энэ хүн өөрөө сүүлийн хэдэн сайдын үед Боловсролын дэд сайдаар ажиллаж байсан, манай сургуулийн нөхцөл байдлыг хамгийн сайн мэдэх хүн баймаар. Гэтэл одоо манай сургууль хотын төвд байрладаг шалтгаанаар газрыг маань авч, яамны барилга барих гээд байгаа юм. Үүнийгээ далдлахын тулд “Боловсролын үнэлгээний төв барина” гээд яваад байгаа.

Боловсролын үнэлгээний төв барих тендерээ ч зарласан байна лээ. Бид холбогдох бүх газар луу нь хүсэлт явуулсан. Бидний хүсэлтэд “Энэ газрыг чөлөөлөх нь зөв, шинэ сургууль барих ажилд нь хөрөнгө санхүүгээр тусална” гэдэг агуулгатай хариу ирүүлсэн. Өнгөц харахад биднийг дэмжээд байгаа юм шиг атлаа тийм биш. БСШУЯ-аас сүүлд ирсэн чиглэл дээр манай сургуулийн барилгыг ШУТИС-ын харьяа “Модны төв” гэж баруун дөрвөн замд байдаг газарт барихаар тусгасан байна лээ. Гэтэл бидний гаргасан зураг төслөөр бол тэр газарт яагаад ч шинэ сургуулийн барилга баригдах боломжгүй. Тэгэхээр дахиад шинэ зураг төсөл гаргуулж таарах нь ээ дээ. Гэвч энэ зураг төсөл өөрөө 300-400 сая төгрөгөөр гардаг. Бидэнд тийм төсөв хөрөнгө байхгүй. Гол нь яам яагаад заавал манай сургуулийн газрыг авч, биднийг өөр газар луу шилжүүлэх гэж түрэмгийлээд байна вэ гэдэг л асуудал байгаа юм.

Манай ШУТИС 20 мянга гаруй оюутан, хоёр мянга гаруй багш ажилтантай том сургууль. Хичээлийн байр хүрэлцээ маш муу байдаг. Ийм байхад манай сургуулийг Худалдаа аж үйлдвэрийн дээд сургуулийн байр луу нүүж, нэг жил гаруй хугацаанд түрээсэлж үйл ажиллагаа явуул гэсэн. Гэтэл Худалдаа аж үйлдвэрийн сургууль “Байраа бүрэн чөлөөлөх боломжгүй. Зөвхөн гурав, дөрөвдүгээр давхрыг ашиглаж болно” гэсэн. Үнэндээ тэр сургуулийн барилгыг бүхэлд нь түрээслээд ч манай сургуулийн оюутан, багш нарт хүрэлцэхгүй шүү дээ. Багтаамжийн хувьд яагаад ч боломжгүй. Цаашид бид яг яах ёстой юм, бүү мэд. Одоо үндсэндээ энэ газарт сургуулийн үйл ажиллагаа явуулахгүй гэсэн бичиг гаргаад, барилгыг нураахад л энэ сургууль очих газаргүй болж байгаа юм.

Нэмж хэлэхэд, энэ бол ганц ШУТИС-ийн харьяа Үйлдвэрлэл, технологийн сургуулийн асуудал биш. Улсын хэмжээнд яригдах асуудал. Манай улс мал, хөдөө аж ахуйгаа түшиглэн амьдардаг. Манай сургууль бол хөдөө аж ахуйн түүхий эдийг бүтээгдэхүүн болгодог инженер, техникийн ажилтнуудыг бэлтгэдэг цорын ганц сургууль. “Говь”, “Гоёо” гээд олон газарт манай төгсөгчид ажиллаж байна. Манай төгсөгчид эрэлт ихтэй, бүгд ажлын байраар хангагддаг” гэлээ.  

Мөн Үйлдвэрлэл, технологийн сургуулийн төгсөгч, “Говь” ХК-ийн инженер Ц.Золзаяа өөрийн байр суурийг илэрхийлсэн юм. Тэрбээр “2021 оны дөрөвдүгээр сард ШУТИС-ийн ТУЗ-ийн хурлаар манай сургуулийг нурааж, газар дээр нь шинэ барилга барина гэж тушаал гаргасан. Бид тушаалын агуулгыг хараад бидний удаа дараа тавьсан хүсэлтийг шийдвэрлээд, шинэ сургууль баригдах гэж байгаа юм байна гэж ойлгосон. Гэтэл үнэндээ БСШУЯ-ны харьяа Боловсролын үнэлгээний төв баригдах гэж байгаа юм байна гэдгийг багш, ажилчид, төгсөгчид бид одоо л мэдэж байна. Манай сургууль 22 төрлийн мэргэжилтэн бэлтгэдэг. Хөнгөн аж үйлдвэрийн салбарын монголд ганц байдаг сургууль. Мөн 2020 оны судалгаагаар тус 22 мэргэжлийн зургаа нь өндөр эрэлттэй мэргэжлийн тоонд орсон байдаг.

Шинэ Засгийн газрын бодлогоор ч гэсэн уул уурхайн  бус чиглэлээр үйлдвэрлэлээ нэмэгдүүлж, эдийн засгаа сэргээнэ гэж ярьсан. Гэтэл хөгжүүлнэ гээд байгаа салбарын мэргэжилтэн бэлтгэдэг ганц сургуулиа нураагаад, газар дээр нь яам өөрийн барилгаа барих нь зөв шийдэл үү. БСШУЯ нь өөрөө монголдоо ганц байдаг сургуулийг нураачихаад ямар боловсролоо үнэлэх гээд байгаа юм. Үнэхээр ойлгохгүй байна. Монголд хүнс, хөдөө аж, ахуй, хөнгөн үйлдвэрийг хөгжүүлээд явж буй ихэнх мэргэжилтнүүд энэ сургуулийг төгсөж гарсан. Тиймээс БСШУЯ-ны дэд сайд, ШУТИС-ийн ТУЗ-ийн дарга Г.Ганбаяр та гаргасан тушаалаа эргэн хараач ээ гэж хүсмээр байна” гэлээ.