Ш.Батсуурь: Үйл ажиллагаа хэвийн үргэлжилж байгаа учраас шахмал түлшний хомсдолд орно гэж айх хэрэггүй

Б. Бадралмаа:
Ярилцлага- Албаны хүний яриа

2020-11-12, 1788

Засгийн газраас Монгол Улсын хэмжээнд Гамшгаас хамгаалах тухай хуулийн дагуу Бүх нийтийн бэлэн байдлын зэрэг шилжүүлж байгааг албан ёсоор зарласан. Бүх нийтийн бэлэн байдлын зэрэгт манайх анх удаа шилжиж байгаа юм. Энэ хүрээнд хүнсний дэлгүүр, хүнсний зах, шатахуун түгээгүүр, эм, эмнэлгийн байгууллага худаг, усан хангамж, дулаан хангамж, цахилгаан станц, хэвлэл мэдээлэл харилцаа холбооны байгууллага, буяны үйл ажиллагааны байгууллагуудыг хэвийн ажиллахыг зөвшөөрсөн. Бусад байгууллагын үйл ажиллагааг түр хугацаанд хориглоод байгаа юм. Тэгвэл нийслэл дэх гэр хорооллын түлшний гол хэрэгцээг хангаж байгаа Тавантолгой түлш компанийн үйл ажиллагаа хэрхэн явж буй болон түлшний нөөц, хангамжийн талаар тус компанийн Хэвлэл мэдээлэл олон нийттэй харилцах албаны мэргэжилтэн Ш.Батсууриас тодрууллаа.

-Агаарын бохирдлыг бууруулах арга хэмжээний хүрээнд нийслэлд түүхий нүүрс түлэхийг хориглосон. Иймд нийслэл дэх өрхийн сайжруулсан шахмал түлшний хэрэгцээг танай компани хангаж байгаа. Засгийн газрын ээлжит бус хуралдаанаар улсын хэмжээнд Бүх нийтийн бэлэн байдлын зэрэгт шилжлээ. Танай компанийн үйл ажиллагаа хэвийн үргэлжилж байна уу?

-Манайх хэвийн ажиллаж байна. Учир нь, манай компанийн үйл ажиллагаа дулаан хангамжийн байгууллагадаа харьяалагддаг. Бүх үйл ажиллагаа хэвийн явагдаж, ажилчид хүлээсэн үүрэг даалгаврын дагуу ажил үүргээ гүйцэтгэж байна. Манай компани өнгөрсөн хавраас дотоодын цэргийн хамгаалалтад орчихсон. Халдвар хамгааллын дэглэм баримтлан ажиллаж байгаа.

-Шахмал түлшний нөөц хангалттай бий юү. Энэ жил хэчнээн хэмжээний түлшний нөөц бэлтгэсэн бэ?

-Түлшний нөөц хангалттай бий. Мөн цаг агаар дулаан байгаа учраас шахмал түлшний хэрэгцээ харьцангуй бага байна. Одоогийн байдлаар 80 орчим мянган тонн сайжруулсан түлшний нөөц байгаа. Энэ тоо цаашид нэмэгдэнэ. Цаг агаарын нөхцөл байдал харьцангуй дулаан байгаа тул борлуулалтын цэгүүдээс захиалга бага ирж байна. Борлуулалтын цэгээс илүү гарсан түлшээ бид нөөцөлж байна.

-Борлуулалтын цэгүүдийн үйл ажиллагаа хэвийн байгаа гэсэн үг үү?

-Сайжруулан шахмал борлуулах цэгүүд мөн хэвийн ажиллаж байгаа. Улаанбаатар хотын хэмжээнд нийт 620 цэг албан ёсны гэрээ байгуулан ажиллаж байна. Зарим нь дулаан түлшний хэрэглээ бага байгаа учраас төвлөрч ажиллаж чадахгүй байгаа. Шахмал түлш борлуулах цэгүүдийг ихэвчлэн төв зам дагуу явуулдаг. Түүнчлэн алслагдсан гэр хорооллын буюу өндөрлөг газарт амьдардаг айл өрхүүдэд хүртээмжтэй байлгах үүднээс цэгүүдийн тоог нэмэхээр төлөвлөж байгаа.

-Нэг айлд олгож буй нүүрсний норм хэмжээг онцгой цаг үетэй уялдуулан нэмэх үү?

-Нэг өрх долоо хоногт зургаан уут нүүрс хэрэглэх нормтой. Одоогоор нүүрсний хэмжээ бага байна гэх санал гомдол хараахан ирээгүй байна. Иймд тоог нэмэх эсэх талаар ярилцсан зүйл байхгүй.

-Үйлдвэр энэ жил хэр ачаалалтай ажиллаж байгаа вэ?

-Одоогийн байдлаар хэвийн байна. Бид өмнө жилийг бодвол илүү туршлагатай болсон.

-Борлуулалтын цэгүүдэд өдөрт хэчнээн хэмжээний тонн нүүрс хүргэгдэж байна вэ?

-Одоо дулаан байгаа тул өдөрт 1500-2000 тонн нүүрс борлуулалтын цэг рүү ачигдаж байна. Нүүрсний үнэд өөрчлөлт ороогүй. 25 кг-ийн савлагаатай нүүрс 3750 нэг тонн 150 мянган төгрөгийн үнэтэй байна. Манай компанийн үйл ажиллагаа хэвийн явагдаж байгаа учраас түлшний хомсдол үүсэх вий гэж айх хэрэггүй.

Ш.Батсуурь: Үйл ажиллагаа хэвийн үргэлжилж байгаа учраас шахмал түлшний хомсдолд орно гэж айх хэрэггүй

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.