Кино урлагийн түүхэнд агент Жеймс Бондын дүрээрээ үзэгчдэд хоногшсон нэрт жүжигчин Шон Коннери өнгөрсөн амралтын өдрөөр 90 насандаа хорвоогийн мөнх бусыг үзүүллээ. Тэрбээр 1930 оны наймдугаар сарын 25-нд Шотландын нийслэл Эдинбург хотод мэндэлж, өсвөр насандаа мэргэжлийн хөл бөмбөгийн багт тоглодог байжээ. 23 насандаа Шон хөл бөмбөгийн спортоо орхиж жүжигчин болохоор шийдсэн юм. Тэрбээр Их Британийн цэрэгт алба хашиж, мөн усан цэргийн тэргүүн фронтод алба хашиж байсан нь түүнийг Жеймс Бондын дүрийг бүтээхэд нөлөөлсөн байж ч мэднэ. Жеймс Бондоос гадна түүний бүтээсэн мартагдашгүй таван дүрийг танилцуулж байна.

1.”The Man Who Would Be King” (1975)

Жон Хьюстон болон Майкл Кейн нарын хамтран бүтээсэн уг кинонд Даниел Дравотын дүрийг бүтээжээ. Мөн тус кинонд дүр бүтээхийн зэрэгцээ “The Wind and the Lion” кинонд тоглосон байна.

2.”Indiana Jones and the Last Crusade” (1989)

Киноны гол баатрын эцэг болох профессор Хенри Жонесын дүрд тоглосныг нь үзэгчид сайн мэднэ. Ташрамд дурдахад хүүгийнх нь дүрд тоглосон жүжигчин Харрисон Фордоос Шон Коннери ердөө 12 насаар ах байсан юм.

3.”Untouchables” (1987)

Үзэгчид түүнийг жүжигчин Кевин Костнер, Роберт Де Ниро хоёроос "шоу"-г нь булаасан гэдэг. Түүний бүтээсэн Жим Мэлоуний дүр “Тэд хутга гаргавал, чи буу гаргана. Тэд та нарын нэгийг эмнэлэг рүү явуулах бол чи тэдний нэгийг цогцос хадгалах газар руу явуулна. Энэ бол Чикагогийн арга” гэж хэлдэг нь үзэгчдэд хоногшиж үлдсэн билээ. Уг дүрээрээ Шон Коннери “Оскар”-ын шилдэг туслах жүжигчний шагналыг хүртсэн.

4.”Marnie” (1964)

Жеймс Бонд кино цацагдсаны дараахан тэрбээр сэтгэл зүйн триллер “Marnie” кинонд Марк Рутландын дүр бүтээсэн байдаг. Мөн “New York Times” сониноос тус киноны гол дүрийн жүжигчдийг “сэтгэл татам”, “ирээдүйтэй” хэмээн цоллож, туршлагагүй байдлыг нь ч дурдсан нийтлэлдээ онцолж байв.

5.”The Hunt for Red October” (1990)

АНУ руу довтолж буй Зөвлөлтийн усан цэргийн флотын ахмад Марко Рамиусын дүрийг бүтээжээ. Судлаачид АНУ-ын жүжигчин Алек Болдуин, Шон Коннери хоёрыг дүрээ маш сайн бүтээсэн хэмээн сайшаадаг.