Д.ГАНХУЯГ: Монгол Улсад хууль мөрдөж ажиллах төрийн байгууллагагүй болжээ

2021-05-08, 2642

-АН-ын удирдлагууд талцлаа зогсоомоор байна-

Монгол улс нь Ардчилсан орны Төр, засгийн байгууллагын зөвхөн хуулийн хүрээнд ажиллах эрхзүйт төрийн зарчим алдагдаж, Үндсэн хуулиа эрээ цээргүй огоорсон, Хуульгүй, хуулийн засаглалгүй юм шиг эрх баригч намын удирдлагаас өгсөн үүрэг чиглэлийг л хэрэгжүүлдэг, хууль мөрддөггүй төрийн байгууллагатай Хойд солонгос шиг коммунист, дарангуйлагч төртэй орон болж хувирч байна...

Монгол Улс Үндсэн хууль ( ҮХ гэх) болон бусад хууль тогтоомжийг мөрдөж шийдвэр гаргах( хууль тогтоох УИХ биш шүү) байгууллага гэж байхгүй болжээ. Жишээлбэл энэ удаагийн ерөнхийлөгчийн сонгуультай холбогдуулж Үндсэн хуулийн цэц( ҮХЦ гэх)ямар мунхаг шийдвэр гаргав, Улсын дээд шүүх эргэж буцсаар,хамгийн сүүлд гаргасан өөрийнхөө шийдвэрээ илт зөрчиж одоогоос дөрвөн жилийн өмнөх УДШ-н бүртгэлийг үндэслэсэн лавлагааг гэгчийг зүгээр л Тамгын газрын дарга нь гаргачихдаг, Улсын бүртгэлийн газар ямар шийдвэр гаргав. Энэ газрын нэг байцаагчийн гаргасан шийдвэрийг нь Захиргааны хэргийн шүүх түдгэлзүүлчихсэн байхад энэ байгууллага дахиад ямар бүдүүлэг албан бичиг СЕХ-нд гаргаж өгөв. СЕХ нь Үндсэн хууль болон бусад холбогдох бүх хууль тогтоомжийг зөрчсөн шийдвэрүүдийг мэдсээр байж “нэг намаас нэг л хүн Ерөнхийлөгчийн сонгуульд дэвших эрхтэй” гэсэн урьдаас бэлдсэн жижүүрийн популист үгээр нийгэм лүү чиглэсэн сурталчилгаа хийж, ачир дээрээ эрх баригч улс төрийн намын удирдлагын захиалгаар ард түмний Үндсэн хуулиар олгогдсон сонгох, сонгогдох эрхэнд хэрхэн халдаж байгаагаа нуухыг оролдов...

Дээр бичсэн бүхэн баримттай. Энэ бүхэн нь тогтолцооны буюу томилгооны гажигтай холбоотой. Үндсэн хууль болоод бусад хууль тогтоомжийг мөрдөж шийдвэр гаргах ҮХЦ, УДШ, СЕХ зэрэг төрийн байгууллагууд нь улс төрөөс хараат бус шийдвэр гаргах үндсэн чиг үүрэгтэй.

Гэтэл дээрх байгууллагын бүрэлдэхүүнийг нь Ерөнхийлөгч, УИХ, Засгийн газар тэнцүү хувааж томилдог тогтолцоотой. Тэгээд УИХ-д олонх болсон нам нь УИХ, Засгийн газрын зургаан хувийн кувот дээрээ өөрийн намын улстөрчид, эсхүл гар хөл болсон хүмүүсээ томилсон учраас, энэ хүмүүс нь өндөр албан тушаалдаа байхын тулд улстөрчдийн захиалгыг хэрэгжүүлдэг нь нэгэнт тодорхой болжээ.

Ийм байхад, 30 жил явж ирсэн нь энэ дампуу байдлыг улам даамжруулсан хууль баталж байгаа мөртлөө эсрэгээр эрх баригч намын удирдлага, УИХ-н гишүүд дээрх байгууллагуудад бие даасан, улс төрөөс хараат бус шийдвэр гаргах нөхцөлийг бүрдүүлэх зорилготой эрх зүйн шинэчлэл хийж байна хэмээн ам, ажлын нэгдэлгүй зүйл байнга яриад байгаа нь олон түмнийг хууран төөрөгдүүлдэг мэргэшсэн үйл ажиллагаагаа явуулж байна гэж үзсэн үзэл бодол, уур амьсгал аль хэдийн нийгэмд бүрэлджээ. Энэ нь бол чөлөөт хэвлэл мэдээллийн салбар, ардчилсан нээлттэй нийгмийн ач тус юм. Ийм нийгэмд нь улс төрийн нам, улстөрчид иргэд, сонгогчдыг богино хугацаанд хэрсүү болсныг мэдрэхгүй тохиолдол байнга гардагтай холбоотой юм. Өнөөгийн төр, засгийн төрийн байгууллагын үйл ажиллагаа дахь улс төрийн намын оролцоо, эдийн засаг дахь төрийн оролцоо нь Ардчилсан Монгол улсыг жаахан дэгсдүүлж хэлбэл гамшгийн байдалд хүргээд байна.

ҮХЦ-н шийдвэрийг аваад үзье

Ер нь “Эх нь булингартай бол адаг нь булингартай” гэдэг ард түмний мэргэн сургаал байдаг. Өнөөгийн үүссэн нөхцөл байдал, хэрэв цаашид даамжирч нийгэмд тогтворгүй байдал үүсвэл ҮХ-г зөрчиж балмад шийдвэр гаргасан ҮХЦ хариуцлага хүлээх нь дамжиггүй. Юу үнэн гэвэл энэ үнэн байх болов уу.

ҮХЦ-н шийдвэр Үндсэн хуулийг хэрхэн зөрчсөн бэ.

Энэ нь Үндсэн хуулийн ”Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно." гэсэн заалттай шууд холбоотой. Гэвч;

Нэгд: Хууль зүйн талаас нь авч үзвэл энэ заалтын үг бүр адилхан үйлчлэлтэйгээр хэрэгжих учиртай.

Хоёрт: Монгол хэлний дүрмээр авч үзвэл ҮХЦ нь дээрх хоёр таслалтай нийлмэл өгүүлбэрийн “... зөвхөн нэг удаа...” гэсэн нэг мөрийг тастаж аваад, монгол хэлний дүрмээр бол “.... зургаан жилээр....” гэсэн хавсралт нэр буюу уг өгүүлбэрийн тодотгол гишүүнийг нь ор тас хаяад, Үнсэн хуульд “ ард түмний олонхын саналыг авч өмнө нь дөрвөн жилээр сонгогдож байсан болон одоо дөрвөн жилийн хугацааны бүрэн эрхээ хэрэгжүүлж байгаа ерөнхийлөгч нарыг дараагийн сонгуульд нэр дэвшүүлэх болон эс дэвшүүлэхтэй холбогдсон заалт, зүйл, улмаар өгүүлбэр байтугай үсэг ч Үндсэн хуульд байхгүй байхад” яг энэ асуудлаар ҮХЦ нь маргаан үүсгэж дүгнэлт гаргаад, энэ дүгнэлтийг нь эрх баригч МАН-н УИХ дахь олонх хүлээж аваад, цаашид бүүр даамжраад Ерөнхийлөгчийн сонгуулийн тухай хуульд долоон минутын дотор энэ хуулийг зөрчиж” сонгуулиас өмнө зургаан сарын дотор уг хуульд өөрчлөлт оруулж болохгүй гэсэн өөрсдөө баталсан хуулийн заалтаа зөрчиж” өөрчлөлт оруулчихаад... яг өнөөдөр бол зарим УИХ-н гишүүд өлсгөлөн зарлаад, хатуу хөл хорио тавигдаж байгаа болохоор...нээрэн бид юу хийчих вээ гэж гэнэт гайхширан түр азнаж байх шиг санагдаж байна.

Уг нь бол УИХ дахь олонх намынхаа удирдлагыг төлөөлж төрийн эрх бариагүй... нийт сонгогчдын 40 гаруй хувийн санал авсан ч төрийн сүлдэнд тангараг өргөснөөс хойш бол нийд иргэдийг төлөөлж эрх барих учиртайгаа аль болох эрт ухамсарлан ойлговол Монгол Улсын язгуур эрх ашиг, нийгмийн тогтвортой байдал, түүнчлэн тусгаар тогтнол, аюулгүй байдал,хуульт ёсонд нийцэхээр байна...

Олон улсын жишгээр ҮХ-г эрх баригч намын удирдлага хийгээд УИХ-н олонхын шийдвэр зөрчвөөс иргэд, сонгогчтой байгуулсан амлалт, түүнчлэн гэрээгээ зөрчиж байна гэж үздэг. Энд “Буруу замаар явбал Буцахдаа будаа тээнэ,Муу хүн чөлөөнөөр Чоно борооноор” гэдэг ард түмний сургаалыг өөрийн эрхгүй бодоход хүргэж байна.

Цаашилбал сонин жүжиг их тавигдлаа. Дээрх асуудлаар илт эрх баригч намын талыг баримтлагч улс төрийн намын нэг гишүүн ҮХЦ-эд хандаж уг асуудлыг ҮХЦ-н доод суудлын хуралдаанаар хянан үзээд маргаан үүсгэх шаардлагагүй гэсэн шийдвэр гаргасан ч уг шийдвэрт эрх баригч МАН-аас УИХ-д хоёр ч удаа сонгогдож байсан ҮХЦ-ийн нэг гишүүн нь гарын үсэг зурахгүй зугтсан гэдэг. Энэ хооронд УИХ дахь олонх ҮХЦ-н бүрэн эрхийн хугацаа дууссан хоёр гишүүний нэгийг нь сугалан авч үлдээд, нөгөө ҮХЦ-н доод суудлын дээрх шийдвэрийг гаргахад оролцсон гишүүний бүрэн эрхийг дуусгавар болгож, орных нь гишүүнийг эрх баригч намаас нэр дэвшүүлэн томилж,энэ шинэ гишүүн нь дээрх асуудлаар ҮХЦ-н дунд суудлын хуралдаанд оролцож ҮХ-г балмадаар зөрчсөн шийдвэрийг гаргалцав. ҮХЦ яагаад доод суудлын хуралдаанаар маргаан үүсгэх шаардлагагүй гэж шийдвэрлэсэн шийдвэрийг хуульд заасан дэгийн журмаа зөрчиж дунд суудлын хуралдаанаараа хэлэлцэв гэдэг нь хэнд ч ойлгомжтой.

Дээрх тайлбараас ҮХЦ улс төрийн захиалгаар ажиллаж ҮХ-ийг балмадаар ноцтой зөрчсөн нь тодорхой харагдах болов уу.

УДШ яагаад эргэж буцсан, хоорондоо зөрчилтэй шийдвэр гаргаад байна вэ гэхээр... Шалтгаан нь өмнөх Ерөнхийлөгч, эрх баригч намын өмнөх дарга болон одоогийн МАН-ын удирдлагын үед томилогдсон шүүгчид нь УДШ-ийн шүүгчдийн олонхыг бүрдүүлж байна гэж дотроосоо ярьсаар, хэвлэлээр бичсээр ярьсаар байна. Энэ нь үнэний ортой байх. Энэ бол бас л нөгөө томилгооны тогтолцоо буруу байгаатай шууд холбоотой. Үүнийг зарим улс төрчид нөгөө МАНАН хэвээрээ байна гэж ярьж байна.

Хэн нь МАНАН биш хэн нь МАНАН юм гэдгийг ойлгоход хүндрэлтэй... Хэвлэлд бичиж байгаагаас нь дүгнэхэд улсын хөрөнгөөр хайгуул хийж нөөц тогтоосон Таван толгойн ордын өрмийг нь хамсан, 60 жилээр төмөр замтай нь хамт авах гэсэн хууль бус оролдлогыг удаа дараалан хийсэн, Оюутолгойн төслийн зардлыг санаатайгаар хоёр ч удаа хяналгүй хуйвалдан хэтрүүлж 2051 он хүртэл Монголын ард түмэн, Засгийн газрыг ногдол ашиг авахааргүй болгосон, нөгөө Эрдэнэт компанийн 49 хувь, 51хувийн зэрэг асуудал дээр хууль зөрчиж эх орон, ард түмний эрх ашгийг ноцтой хохироосон нам дамжсан улс төр, эдийн засгийн гэмтэй бүлэглэл( баялгийн хуваарилалтыг эрх мэдэл албан тушаалаа урвуулан ашиглаж хууль бусаар явуулж завшдаг, төрөөс төрсөн олигархиуд гэх)юм уу гэж ойлгогдохоор байна...

Энэ мэтээр ҮХЦ болон УДШ-н хууль зөрчсөн шийдвэрт үндэслэж одоогийн байдлаар гаргаад байгаа СЕХ-ны улс төрийн захиалгатай шийдвэр гаргасан гэдэгтэй холбогдуулж хэлэх ч үг алга...

Өнөөгийн үүссэн нөхцөл байдалтай холбогдуулж эрх баригч МАН-ын удирдлага, УИХ-н дарга нь “АН-ынхан намынхаа дотоод зөрчлийг хагарлыг битгий төрийн зөрчил, хагарал болгох гээд бай. УИХ нэг намын дотоод асуудлыг шийддэг газар биш” гэсэн яг адилхан утгатай үг хэлж байна. Энэхүү Ерөнхийлөгчийн сонгуульд нэр дэвшигчийг хуулийн дагуу тодруулахтай холбогдсон эрх баригч намын удирдлагын хуульт ёсонд үл нийцэх байр суурь нь Сүхбаатар кинон дээр “Нэг домч лам Сүхбаатар жанжинд эм биш хор өгчихөөд гарахдаа... жанжин та хурдан эдгээрээ” гээд гардагтай агуулга, агаар нэг байгаа нь хэнд ч ойлгомжтой байна. Шалтгаан нь дахин хэлэхэд төрийн хуулийг мөрдөж улс төрөөс хараат бусаар шийдвэр гаргах үндсэн үүрэгтэй ҮХЦ, УДШ, УБЕГ, СЕХ-ны та бүхнээс сонгогдон томилогдсон удирдлагын хуульт ёсыг уландаа гишгэсэн шийдвэрүүд үүнийг нотолж байна.

Эрх баригч МАН нь муу байвал Монгол улс улам муудна. Та бүхэн хэдийгээр УИХ-д дийлэнх олонх (83.3%) ч гэсэн 2020 оны УИХ-н сонгуулиар нийт сонгогчдын 40 гаруйхан %-н саналыг авсан ч төрийн сүлдэндээ тангараг өргөснөөр улс эх орон, нийт иргэдийн эрх ашгийг чандлан дээдлэх учиртай.

Өөрөөр хэлбэл гол өрсөлдөгч болох АН-н гишүүд дэмжигчдийн эрх ашгийг ч ялгаваргүйгээр дээдлэх учиртай. Энэ бол ардчилсан орны улстөрчид, улс төрийн намын гуйвалтгүй баримтлах үндсэн зарчим юм. Цаашид олон намаас олон хүн нэр дэвшиж санал хуваагддаг УИХ-ын сонгуулийн тогтолцоог өөрчлөхгүй бол асуудал бишдэх нь ойлгомжтой байна. Үүнд ганцхан МАН биш АН ч буруутай.

Энэ удаагийн ерөнхийлөгчийн сонгуульд зөвхөн дөрөвхөн суббьектээс дөрвөн хүн л нэр дэвших эрхтэй. Гэтэл энэ сонгуульд МАН-нхан намын даргаа энэ дэвшүүлж ямар ч үнээр хамаагүй ялуулахын тулд ноёны бөх шиг асуудалд хандаад байгааг нийт иргэдийнх ихэнх ойлгочихсон байна. Ноёны бөх гэдэг ойлголт чинь социализмаас өмнөх феодалын нийгмийн үеэс гаралтай үг болов уу.Монгол орон саяхан Азийн цээжин дахь Ардчиллын баян бүрд хэмээн нэрлэгдэж хөгжилтэй барууны орнуудаас зээл тусламжийг нь хангалттай авсан. Та бүхэн энэ удаагийн ерөнхийлөгчийн сонгуультай холбогдуулж босгосон хууль бус шийдвэрийнхээ талаар гадаад ертөнц түүнчлэн өмнөд хөрш болон гурав дахь ч хөрш орнуудын найз нөхдөөсөө байр суурийг нь сонирхож үзээч... бүрэн мэдээлэлтэй байгаа нь үнэхээр толгой сэгсэрч байна гэж ойлгосон.

Энэ ардчилсан нийгэмд улс төрийн нам, улстөрчид хүний нийгмийн хөгжлийн түлхүүр болсон өрсөлдөөнгүйгээр, ялангуяа бодлогын өрсөлдөөнгүйгээр, түүнчлэн нийт иргэдийн өмнөөс эрх баригч улс төрийн хүчний үйл ажиллагаанд хяналт тавих үүрэг бүхий цөөнхийн хатуу шүүмжлэлийн ташуургүйгээр засаглахыг хүсвэл тэр орон богинохон хугацаанд сүйрдгийг зарим орнуудын гашуун туршлага, түүх харуулсан байдгийг судалж үзвэл сайнсан.

2012-2017 оны хооронд АН УИХ-д олонх биш олуулаа байж “Шударга ёс" эвсэлтэй хамтарч засгийн эрхийг барьж, АН-с нэр дэвшиж сонгогдсон ерөнхийлөгчтэй байсан нь үнэн. Гэхдээ УИХ-д хүчтэй цөөнхтэй, эрх барьж байгаа хоёр улс төрийн нам үзэл бодлын нэлээд зөрөөтэй учир маш сайн хяналттай байсан. Нөгөө талаас улс төрийн тогтолцооны онцлогоос хамаарч сүүл лүү гээ МУ-н ерөнхийлөгч ч УИХ дахь цөөнхтэйгөө нягт хамтарч ажиллаж байсан нь ч бас бодит үнэн. Өнгөрсний муу талыг хаяж, сайн талыг хөгжүүлж урагшилдаг нь ухамсарт хүний нийгэм, хүн, байгууллага, улсын хөгжилд баримталдаг үндсэн зарчим юм.

Төрийн хуулийг мөрдөж, сахиулж шийдвэр гаргах учиртай ҮХЦ, УДШ, УБЕГ, СЕХ зэрэг төрийн байгууллагын удирдлагууд албан тушаалаар барьцаалагдан улс төрийн захиалгаар хууль зөрчсөн шийдвэр гаргахаа зогсоож, ардчилсан монгол улс, нийт иргэдийн эрх ашиг, хуульт ёс, хойч ирээдүй, эх орныхоо нийгмийн тогтвортой байдлыг хангах талд зогсох цаг үе ирснийг бодолцох хэрэгтэй байна.

АН-ын 2004 оноос хойших үе үеийн удирдлагууд та бүхэн хоорондын өсөрхлөө зогсоож ардчилсан Монгол Улсын ардчилал, нийт иргэдийн эрх ашиг ,хувь заяа, хуульт ёс, намынхаа олон мянган гишүүд, дэмжигчдийн эрх ашиг, залуу үеэ бодож таалцлаа зогсоомоор байна. Өс санадаг хүмүүний Үйлс бүтдэггүй гэж өвөг дээдэс сургасан байдаг. Ялангуяа эх орон, нийт иргэдийн эрх ашгийг нэн тэргүүнд тавих үүрэгтэй төрийн хүн өсөрхлөө тэвчиж чадахгүй бол төрийн үйл хэрэгт оролцох үндсэн шаардлагыг хангахгүй хэмээн үздэгсэн билээ.

Та бүхэн Ардчиллын анхдагч С.Зориг агсныхаа эхлээд улсын, дараа нь намынхаа, хамгийн сүүлд хувийнхаа эрх ашгийг тавих гэсэн хүн чанарын болон шинжлэх ухааны үндэслэлтэй үзэл баримтлалын агуулгын эрэмбийг амаараа биш үйлдлээрээ хэрэгжүүлж өнөөгийн үүсээд байгаа асуудлыг шийдэх гарцыг олох цаг үе ирснийг ухаармаар байна. Нийгмийн зүгээс АН-хан дотроо учраа олох ёстой гэсэн шүүмжлэл бол туйлын зөв.

Овоо босгоогүй бол шаазгай юун дээр суух вэ гэдэг онч мэргэн үг байдаг.

Хэрэв одоо цөөхөн монголчууд бид ялангуяа энэ асуудалтай холбоотой шийдвэр гаргах эрх бүхий улс төрийн намын удирдлагууд ҮХ болон хуульт ёсыг эрхэмлэн дээдэлж хуулийн гарц гаргахгүй бол нөгөө Жоомоо алах гээд Байшингаа шатаачихлаа гэдэгтэй адилхан нөхцөл байдал манай нийгэмд үүсэхэд тун ойрхон байна. Цаашид бас хуулийн тухайд яаралтай засах 1, 2 чухал гэж бодох санал байна. Энэ намаа удирдаж парламентын сонгуульд удирдан орж УИХ-д олонхыг бүрдүүлж Засгийн эрхийг авчихаад тодорхой бус шалтгаанаар амлалтаасаа зугтаж Ерөнхий сайдын ажлаа өгч дараа жилийн ерөнхийлөгчийн сонгуульд өрсөлддөг энэ шударга бус бусармаг үйлдлийг хуулиар хязгаарлах хэрэгтэй байна.Бид сүүлийн 30 орчим жилд Засгийн газраа байсхийгээд огцруулж(ЗГ-н дундаж насжилт 1.5 жил) ирсэн нь улс орны хөгжилд ихээхэн сөрөг нөлөөтэй байсан гэсэн дүгнэлтэд хүрч ҮХНӨ-өөр ерөнхий сайддаа хэмжээлшгүй эрх мэдлийг саяхан өгсөн бус уу...

Нөгөө талаас МАН, МАХН гэдэг нэр чинь Монгол улс ганц намын тогтолцоотой үеийн улс төрийн намын нэр.Тиймээс шударгаар хандвал эдгээр нэр нь бүх ард түмний оюуны өмч байх ёстой юм биш үү... Нөгөө талаас Ардчиллыг АН дангаараа өмчлөх нь шударга бус бас зохисгүй явдал... Тиймээс зөвшилцөл хийгээд ер нь намууд нэрээ өөрчлөх нь одоогийн тулгамдсан асуудлыг шийдэх нэгэн гарц байж болох талтай...

Цаг зав гарган энэ нэг нийтлэл шүү юмыг бичлээ. Надад хувийн ямар ч сонирхол байхгүй. Эх орныхоо ирээдүй, ардчилал, хуульт ёс, шударга ёс, хөгжил дэвшилд бага ч нэмэр болох юм сан гэж бодож явдаг жирийн л нэг Монгол Улсын иргэн.

Одоо УИХ-с шийдвэр гаргаж энэ сонгуулийг түр хойшлуулахгүй бол цаашид бий болох хор уршиг нь өшөө хэд дахин илүү байх нь тодорхой байх шиг байна. Энэ алдаагаа засахгүй бол үнэхээр Монгол төрийн түүхэнд байгаагүй томоохон хар толбо болж үлдэхийг ч үгүйсгэхийн аргагүй байна.Яагаад халдварт өвчин улс даяар тархсан, эрдэнэт монгол хүн амь насаа алдаж байгаа зөвхөн энэ жил вакцин авах хөрөнгөө ч бэлдээгүй байж Ерөнхийлөгчийн сонгуулийн үр дүн гарах өдрийг даруй 14 хоногоор нааш татсан шалтгааныг УИХ-с асуумаар байна.

Дээрх бүх тайлбараас одоо төв талбайд өлсгөлөн болон суулт байгаа УИХ дахь АН-н бүлгийн гишүүдийн зүгээс Эрх баригчдаас “Хуульт ёс болон Шударга ёсыг Дээдлэх”-ийг шаардаж байгаа нь туйлын зөв гэж хэлэх байна. Тэдэнд ийм сайн үйлс хийх эрх үүргийг иргэд, сонгогдогчид нь олгож,боломжийг нь эрх баригчид бий болголоо гэж бодож байна.

Би сэтгэлдээ хүртэл үр дүн гаргаж чадаагүй ч иргэд, сонгогчдоос шударгаар сонгогдож УИХ-н гишүүнээр 12 жил ажилласан. Гэхдээ хуулийг дээдлэн хоёргүй сэтгэлээр зүтгэж байснаа одоо бодоход өөртөө харамсдаггүй. Тэр үед улс төрийн нөхцөл байдал хүндрэхэд МАН-ын Д.Лүндээжанцан, Ц.Нямдорж, Ө.Энхтүвшин нарын ахмад улстөрчдөөс үнэхээр төрийн түшээгийн үнэр, шинж чанар гардаг байсан. Одоогийн УИХ дахь олонх дотор ийм туршлагатай улстөрчид байгаа эсэх нь мэдрэгдэхгүй байна. Мэдээж тэр үед АН-д ч олон мундаг улстөрчид байсан.

Олон жилийн түүхт Монгол улсын төрт ёс тогтвортой төвшин байж, олон түмэн маань улам амар амгалан байх болтугай!

Д.ГАНХУЯГ: Монгол Улсад хууль мөрдөж ажиллах төрийн байгууллагагүй болжээ