Чөлөөт бөхийн “U20” ангиллын 2025 оны залуучуудын улсын аварга шалгаруулах тэмцээн тавдугаар сарын 5-6-ны өдрүүдэд Спортын төв ордонд амжилттай зохион байгуулагдаж өндөрлөсөн билээ. Тус УАШТ-ий эмэгтэйчүүдийн 55 кг-ын жинд барилдаж алтан медаль хүртэж, залуучуудын улсын аварга болсон “Баянгол дүүрэг Аваргууд академи”-ийн тамирчин Цэвээнийн Одончимэгтэй ярилцлаа.

-Чөлөөт бөхийн “U20” ангиллын УАШТ-ий 55 кг-ын жинд түрүүлж, алтан медаль хүртсэнд баяр хүргэе.

      -За баярлалаа.

-Миний дүү өөрийгөө танилцуулахгүй юу?

  -Намайг Цэвээний Одончимэг гэдэг. Орхон аймгийн Эрдэнэт хот төрж өссөн. Одоо 19 настай. Монгол Улсын боловсролын их сургуулийн оюутан.

-УАШТ-д хэдэн барилдаан хийж алтан медаль хүртэв?

-Энэ жилийн “U20” ангиллын УАШТ-д дөрвөн барилдаан хийж түрүүлсэн.

-Улсын аваргын алтан медалийн төлөөх барилдаанд “Хилчин” спорт хорооны Япон Улсад сурдаг Б.Халиунтай ямар тактикаар барилдаж ялалт авсан бэ?

     -Ерөнхийдөө манай багш нар маань Б.Халиунтай том барьцнаас золгож барилдаарай гэж захисан. Мөн “Зай өгөхгүй, тулж барилдан шүү” гэж зөвлөсөнөөр л барилдсан.

-Энэ удаагийн УАШТ-ий хамгийн хүч, ширүүн өрсөлдөгч хэн байсан бэ?

    -Хамгийн хүчтэй, ширүүн өрсөлдөгч Б.Халиун байлаа. Түүнтэй ширүүн өрсөлдөөнтэй барилдааныг хийсэн.

–“Баянгол Аваргууд академи”-ийн хэн багшийн шавь бэ?

     -Би Эрдэнэтийн “Хангарьд” спортын ордны чөлөөт бөхийн Г.Цэрэнпунцаг багшийн удирдлаган дор  таван жил бэлтгэл сургуулилалтаа хийдэг байлаа. Дунд сургуулиа төгсөөд Улаанбаатар ирээд хотод ирээд МУГТ Б.Наранбаатар, Ц.Мандалсүрэн, ОУХМ П.Лхамгармаа багш нарынхаа удирдлага дор бэлтгэл, сургуулилалтаа үргэлжлүүлэн хийж байгаа.

-“Аваргууд академи”-ийн тамирчин болоод удаж байгаа уу?

    -“Аваргууд академи”-ийн тамирчин болоод жил гаруй хугацаа өнгөрч байгаа.

-Чөлөөт бөхийн спортоор хэд дэх жилдээ хичээллэж байгаа вэ?

     - Чөлөөт бөхийн спортоор 2018 оноос хойш тасралтгүй хичээллэж яваа. Одоо долоо дахь жилдээ хичээллэж байна.

-Бөхийн спортыг сонгож, хичээллэх болсон шалтгаан юу байсан бэ?

      -Чөлөөт бөхийн спортыг сонгож хичээллэх болсон шалтгаан маань гэвэл анх манай сургууль дээр дугуйлангийн бүртгэл хийж явахтай нь таарсан. Тэгээд сонирхоод бүртгүүлсэн. Секцэнд ороод сарын дараа  тэмцээнд ороод барилдсан чинь медаль хүртсэн. Түүнд нь урамшаад улам бүр шамдан хичээллэх болсон. Мөн тэр үед манай хамаатны ах бас чөлөөт бөхөөр хичээллэдэг байв. Тэр ахын нөлөө бас бий. Түүнээс хойш чөлөөт бөхөд бүр улам дуртай болж, бэлтгэл хийгээд л баймаар санагддаг болсон.

-Чөлөөт бөхөөр хичээллэсэн үеэс хойших томоохон амжилтаасаа сонирхуулахгүй юу?

    -Амжилт гэвэл чөлөөт бөхийн өсвөр үеийн УАШТ-ий хошой мөнгөн медальтай. Нэрэмжит тэмцээнүүдийн алт, мөнгө хүрэл медалиуд бий. Олон улсын тэмцээнээс хүрэл медаль, “U23” ангиллын УАШТ-ээс алт, хүрэл медаль, оюутны универсиадын УАШТ-ээс мөнгө, хүрэл, “U20” ангиллын УАШТ-ий алтан медальтай.

–Спортын ямар зэрэг, цолтой вэ?

       -Бөхийн чөлөөт барилдааны спортын дэд мастер цолтой.

–Чөлөөт цаг гарвал юу хийх дуртай вэ?

       -Чөлөөт цагаараа ном унших, гоё байгальтай газарт дуу сонсоод алхах дуртай.

-Энэ 2025 онд ямар тэмцээн, уралдаанд оролцохоор төлөвлөж байгаа вэ?

     -Чөлөөт бөхийн залуучуудын Азийн аварга шалгаруулах тэмцээнд амжилттай оролцож амжилт гаргахыг төлөвлөж байна. Мөн надад итгэл найдвар хүлээлгэн амжилт хүсэж байгаа хүмүүсийн итгэлийг нь алдахгүй байхыг л бодож байна даа.