Арабын Нэгдсэн Эмират Улсын Аль-Айн хотод шатрын насанд хүрэгчдийн Ази тивийн аварга шалгаруулах тэмцээн болж байна. Ази тивийн авргад 34 орны шатарчид эрэгтэй, эмэгтэй ангилалд шилдгүүдээ тодруулах юм. Монголын баг амжилттай тоглож байна. Энэ тэмцээнд Ази тивийн орнуудаас гадна ОХУ-ын баг оролцож байгаагаараа онцлог болж, өрсөлдөөн өрнүүлж эхэлжээ. Азийн шатрын холбоонд ОХУ-ын Шатрын холбоо элссэн учраас тивийн аварга шалгаруулах тэмцээнд оролцож байгаа аж. Дэлхийн цомын эрх олгох тус тэмцээнд их мастер 53, эмэгтэй их мастер 19, олон улсын цолтой 228 шатарчин тоглож байна.

        Эмэгтэйчүүдийн ангилалд Энэтхэгийн их мастер С.Сэшадри, ОХУ-ын Анастасиа Боднарук, Монголын Б.Мөнгөнзул нар адил 4.5 оноотой тэргүүлж эхэллээ. Эдгээр шатарчдын араас Хятад, Энэтхэг, ОХУ, Узбекистан зэрэг орны долоон тамирчин адил 4.0 оноотой бичигдэж байгаа. Харин тэдний дунд Монголын Б.Мөнгөнтуул багтжээ.

       Шатарчид нийт есөн өрөг тоглохоос таван өргийн тоглолт хийсэн. Өнөөдөр зургаа дахь өргийн тоглолт болно. Энэ өрөгт тэмцээнийг тэргүүлэгч Энэтхэгийн Сэшадри ОХУ-ын Анастасиа Боднаруктай, Монголын Т.Мөнхзул Хятадын Сон Юишинтэй тоглохоор оноолт таарчээ. Мөн их мастер Б.Мөнгөнтуул ОХУ-ын Г.Ольгатай зургаа дахь өрөгт тоглох хуваарь гарсан байна.

      Эрэгтэй шатарчдыг Ираны Данэшвар Вардияа, Энэтхэгийн К.Мурали нарын их мастерууд адил 4.5 оноотой тэргүүлж явна. Хятад, ОХУ, Энэтхэгийн таван шатарчин 4.0 оноотой удаалж байна. Манай шатарчдаас олон улсын мастер Г.Амартүвшин гурван оноотой 51-р байрт жагсаж байна.