Булган аймагт өнгөрсөн сонгуулиар МАН үнэмлэхүй ялалт байгуулж, Засаг даргаар нь Д.Пүрэв-Очир томилогдоод буй. Д.Пүрэв-Очирын тухайд Булган аймагт төрж, өссөн, эдийн засагч мэргэжилтэй, “Скайтел” ХХК-аас ажлын гараагаа эхлүүлсэн.

Бизнесийн тухайд, Д.Пүрэв-Очир хөрөнгө орлогын мэдүүлэгтээ “Элэг бүс” ХХК-ийн хувьцаа эзэмшигч гэж бүртгүүлсэн байдаг. Тус компани нь, 2012 онд худалдааны чиглэлээр үйл ажиллагаа явуулахаар байгуулагдсан. Өдгөө “Элэг бүс” ХХК-ийг Д.Пүрэв-Очирын эхнэр Балганы Намууна эзэмшдэг бөгөөд гүйцэтгэх захирлаар нь ажилладаг. Өөрөөр хэлбэл, Д.Пүрэв-Очир эхнэртээ компаниа шилжүүлж, өөрөө далдаас удирддаг гэсэн үг. Эхнэр Б.Намууна нь нийслэлийн 40 дүгээр сургуулийн захирал Б.Балганы охин. Дөрвөн хүүхэдтэй, Улаанбаатар хотод ажиллаж, амьдардаг нэгэн.

Тэгвэл “Элэг бүс” ХХК нь Булган аймгийн хэд хэдэн тендерт ялж байжээ.

Тодруулбал,

-Могод сумын Соёлын төвийн их засвар- 207 сая,

- Нийтийн эзэмшлийн талбайн тохижилт (Булган, Булган сум, Ханддоржийн талбай)-107 сая,

-“Эрдэнэт үйлдвэр”-ийн дулааны цахилгаан станцын Түлш дамжуулах хэсгийн технологийн тоноглолыг автоматжуулах ажил-229 сая төгрөгийн тендерт шалгарч байсан түүх байна.

Эндээс хардаж харвал, Засаг даргаар томилогдоогүй буюу ИНЕГ-т ажиллаж байхдаа л төрсөн нутгийнхаа тендерийг “түүж” явсан байгаа юм. Тэгвэл өдгөө Д.Пүрэв-Очир эрх мэдэлд хүрсэн учраас тэрбээр эхнэрийнхээ компаниар хэд л бол хэдэн тендер үргэлжлүүлэн авах боломжтой болжээ гэсэн үг.

Булган аймгийн Засаг дарга Д.Пүрэв-Очирын хувь хүн, ар гэр, бизнесийг нь цухас танилцуулахад ийм байна. Харин түүний улс төрийн хамаарлыг үзвэл, УИХ-ын гишүүн, “сахал” хочит Ж.Бат-Эрдэнийн “бүлэглэл”-ийн хүн гэгддэг. Ж.Бат-Эрдэнийг Зам, тээврийн хөгжлийн сайдаар ажиллаж байхад буюу 2018 онд тэрбээр ИНЕГ-т хэлтсийн даргаар томилогдсон байдаг. Төрд ажиллаж үзээгүй нутгийн дүүгээ Ж.Бат-Эрдэнэ ИНЕГ-ын Санхүүгийн даргаар томилуулаад, өөрөө сайдын суудлаасаа буусан. Ингээд таван жил ИНЕГ-т ажилласан Д.Пүрэв-Очир төр солигдох үедээ ажлаа өгч, 2023 оноос Булган аймгийн Монгол Ардын намын хороонд Намын дэд даргаар ажиллаж эхэлсэн байдаг. Ж.Бат-Эрдэнийн шууд удирдлаган дор гэсэн үг.  Ингээд жил орчим тойргоо усалж, булганчуудтай “ноцолдсон”-ы эцэст Булган аймгийн ИТХ-д нэр дэвшиж, Засаг даргаар нь томилогдоод байна. Төрд ажилласан туршлага нимгэн Д.Пүрэв-Очирыг Ж.Бат-Эрдэнэ л Засаг даргад зүтгүүлсэн нь тодорхой харагдаж байгаа биз ээ.

Ирэх дөрвөн жилийн хугацаанд Ж.Бат-Эрдэнэ, Д.Пүрэв-Очирын хоршил Булган аймгийг бүх талаар “эзэгнэх” нь нэгэнт тодорхой биз ээ.