Хэнтийнхэн улс төрд “ноёрхож” байна. Төрийн албаныхны тэн хагас нь Хэнтийнх, тэгээд зогсохгүй МАН-ын гишүүн болоод буй. Хоржоонтой нь, орон нутгийн сонгуульд нийслэл, дүүрэг, аймаг, сум, баггүй МАН-аас дэвшсэн бүхэн ялалт байгуулж байхад Хэнтийд АН ялсан. Энэ үйл явдлыг хүмүүс “Хэнтийхэн Төрийн гурван өндөрлөгийнхөө эсрэг “зогссон” хэмээн хошигнож байлаа. Тэр ч утгаараа Хэнтий аймгийн удирдлагууд олны анхаарлын төвд байгаа.

Тэгвэл Хэнтий аймгийн Засаг даргаар Дамдинжавын Аюурбунь томилогдсон. Аймгийн ИТХ анхдугаар хуралдаанаар Засаг даргад Д.Аюурбунь нэр дэвшиж, нэг саналын илүүгээр дэмжигдэж, улмаар албан туүаалдаа томилогдсон. Д.Аюурбунийн хувьд Ерөнхий сайдтай нэг нутгийн, нэг үеийн төгсөгч. Тэрбээр Хэнтий аймгийн Хэрлэн суманд төрж, МУИС-ийг төгссөн. Хэнтий аймгийн Засаг дарга асан Ж.Оюунбаатарын зөвлөхөөр ажиллаж, улс төрд орсон түүхтэй.

Д.Аюурбунь УИХ-ын гишүүн Ц.Баатархүүтэй дотнын найз, ажлын хамтрагчид. Тэд 2004 онд “Монголын лектор төв”-ийг хамтран үүсгэн байгуулж, 2013 оноос үйл ажиллагаагаа өргөжүүлэн “Эм Эл Си Трейнинг” ХХК болгон удирдаж байгаа. Д.Аюурбунь ерөнхий менежер, Ц.Баатархүү гүйцэтгэх захирлын албан тушаалтай. “Эм Эл Си Трейнинг” ХХК нь Цахим хөгжил, харилцаа холбооны яамны 70 сая төгрөгийн төсөвтэй тендерт ялж байсан түүхтэй. Тодруулбал, Олон улсын мэргэжлийн холбоо, стандартын байгууллагын Python сертификатын ЕБС-ийн мэдээлэл зүйн 50-аас доошгүй тооны багшид олгох сургалтын тендерт 2023 онд шалгарч байжээ. Энэ нь Ц.Баатархүүг Цахим хөгжил, харилцаа холбооны сайд болохоос нэг жилийн өмнө гэсэн үг.

Ноцтой нь, Д.Аюурбунийн бие нь АН-ынх ч бизнес нь МАН-ынхантай холбогддог. Тодруулбал, Д.Аюурбунь “Магнай трейд” компанийн эзэн Р.Ганзоригийн удирдлага дор таван жил ажилласан нэгэн. Тодруулбал, 2017-2018 онд “Жи-Мобайл” ХХК-ийн Захиргаа удирдлагын хэлтсийн дарга, Орон нутгийн гэрээт хариуцсан захирал, Хүний нөөц хариуцсан захирал, 2018-2023 онд “Магнай Трейд” ХХК-ийн Хүний нөөц эрхэлсэн захирал, Борлуулалт хариуцсан дэд захирал, Тос гэрээт борлуулалт хариуцсан захирлаар ажилласан. “Магнай трейд” ХХК-ийн эзэн Р.Ганзориг Хэнтий аймгийн Дадал сумын уугуул. Энэ ч утгаараа Д.Аюурбунийг салбар хариуцсан захирлаараа олон жил ажиллуулсан гэсэн үг.

Түүнчлэн Р.Ганзориг хүү Г.Дашнямыгаа улс төрд 2021 оноос сойж эхэлсэн. Тодруулбал, Г.Дашням 2021 оноос улс төр сонирхох болж, МАН-ын дэргэдэх НАМЗХ-ны Удирдах зөвлөлийн гишүүн болсон. Дараа нь, 2022 онд “Жи-Мобайл” ХХК-ийнхаа сүлжээг өргөтгөх нэрээр аавынхаа нутаг Хэнтий аймгийг бүтэн тойрч сонгогчдын “тандалт” хийсэн. Энэ бүх хугацаанд Д.Аюурбунь түүнтэй хамт сумдаар тойрсон. Ингээд 2023 онд Г.Дашням Хэнтийг орхиж, Сүхбаатар, Чингэлтэй дүүрэгт нэр дэвшихээр болоход нь Д.Аюурбунь Хэнтий аймгийн АН-ын даргаар томилогдсон байдаг.

Үүнээс өмнө Д.Аюурбунь “Магнай трейд” ХХК-д ажиллаж байхдаа жижиглэнгийн шатахууны хэд хэдэн компани үүсгэн байгуулж, Хэнтий аймаг болон сумдын төр, захиргааны байгууллагуудад шатахуун “хүч”-ээр нийлүүлж ирсэн байдаг. Тодруулбал, тэрбээр шатахууны жижиглэнгийн худалдааны “Хаан ойл групп”, “Норов ойл” ХХК-ийг ганцаараа үүсгэн байгуулжээ. Д.Аюурбунийн “Норов ойл” ХХК нь Хэнтий аймгийн Батноров сумын ЗДТГ-т хоёр удаа шатахуун нийлүүлэх тендерт хоёр ч удаа шалгарч байжээ.

Мөн тэрбээр “Андууд ойл”, “Андууд констракшн” ХХК-ийг Чингис хотын захирагч Даваажавын Эрдэнэбаатар, Хэнтий аймгийн ЗДТГ-ын дарга Амгаланбаатарын Жаргалсайхан,  ИТХ-ын төлөөлөгч, МАН-ын гишүүн Лхамсүрэнгийн Бат-Октябрь, “Хаан” зочид буудлын эзэн Ганболын Галбадрахтай хамтран эзэмшдэг. “Андууд констракшн” ХХК нь Хэнтий аймгийн Дэлгэрхаан сумын гудамжны тохижуулалт (зам засвар, гэрэлтүүлэг камержуулалт) хийх 41 сая төгрөгийн төсөвтэй тендерт 2022 онд шалгарч байсан түүхтэй. Эндээс харвал, Д.Аюурбунь МАН-ын “тавиул”, АН-ын тендерчин гэсэн үг. Ташрамд сонирхуулахад, Д.Аюурбунийн эхнэр Энхтуяагийн Хишгээ нь “Дайманд майнд” ХХК-ийг эзэмшдэг. Уг компаниараа дамжуулан Хэнтий аймгийн Бэрх тосгоны уугуул, УИХ-ын гишүүн, шарк Ч.Анараас 60 сая төгрөгийн хөрөнгө оруулалт авч, сургалтын төв өргөжүүлсэн байдаг. Энэ нь түүнийг МАН-ынхантай нягт холбоотойг хэлэн нэг баримт болох биз ээ.