Эрчим хүчний сайд Н.Тавинбэх эрчим хүчний салбарын өнөөгийн нөхцөл, аюулгүй байдлыг хангах чиглэлээр хэрэгжүүлж буй ажлын талаар мэдээлэл хийх үеэрээ манай улсын цахилгаан эрчим хүчний өртөг хямд байгаа нь дулаан, цахилгаан дамжуулах, түгээх, хангах компаниуд хөрөнгийн дутагдлаас шалтгаалан техникийн засвар үйлчилгээг цаг тухайд нь хийж чадахгүй байгаа талаар хэллээ.

Тэрбээр “Хэрэглэгчийн цахилгаан, дулааны тариф бодит өртгөөс доогуур байгаатай холбоотойгоор эрчим хүчний компаниудын нүүрсний уурхай болон бэлтгэн нийлүүлэгчдэд өгөх өглөг, банкны богино хугацаат зээл, зээлийн хүүгийн өглөг нэмэгдэж байна. Түүнчлэн дулаан, цахилгаан дамжуулах, түгээх, хангах компаниуд хөрөнгийн дутагдлаас шалтгаалан техникийн засвар үйлчилгээг цаг тухайд нь хийж чадахгүй байх нь хэрэглэгчдийн эрчим хүчний тасралтгүй найдвартай байдлыг хангахад хүндрэл үүсч байна.

Өнөөдрийн байдлаар 1КВт цаг цахилгаан эрчим хүчний өртөг 183.65 төгрөг байхад борлуулалтын тариф энгийн тоолууртай айл өрхөд 134.28-154.8 төгрөг КВт цаг буюу нэгжийн өртгөөс 19-37 хувиар доогуур байна.

Цагийн тоолууртай айл өрхөд өдөр шөнийн хэрэглээнээс хамааран 140.18-112.98 төгрөг КВт цаг буюу бодит өртгөөс 31-63 хувь доогуур байна. Манай улсын цахилгаан эрчим хүчний үнийг хөрш орон болох ОХУ, БНХАУ-ын цахилгааны үнэтэй харьцуулахад 1.3-1.5 дахин, бусад хөгжилтэй орнуудаас 4-5 дахин  хямд байна” гэв.