УИХ-ын нэгдсэн чуулганаар Нийгмийн даатгалын үндэсний зөвлөлийн зарим гишүүнийг чөлөөлөх, томилох тухай асуудлыг хэлэлцэж дууссаны дараа уг асуудалтай холбоотойгоор УИХ-ын дарга Г.Занданшатар үг хэллээ.

Тэрбээр “Нийгмийн даатгалын санд хулгай нүүрлэсэн нь үнэн. Энэ асуудалд Нийгмийн бодлогын байнгын хороо шинэлэг байдлаар хандахгүй байна. ХЭҮК-ын гишүүдийг сонгон шалгаруулалтаар бүрдүүлсэн. Өнгөрсөн хугацаанд Нийгмийн даатгалын сан дампуурсан гол шалтгаан нь тэтгэврийн хэмжээг инфляцийн түвшинтэй уялдуулж байна гэж байнга нэмээд зарлага нь нэмэгдээд, орлогыг нь бүрдүүлэх эх үүсвэр байхгүй байсантай холбоотой. Нийгмийн даатгалын сангийн хөрөнгийг хулгайгаар хүү цохиж байршуулдаг гэмт хэрэг нотлогдсон. Эрүүл мэндийн даатгалын сан ч мөн ялгаагүй. Сангийн менежмент бүрэн алдагдсан. Энэ санг хамгаалахын тулд “манаач” болгож даатгуулагч, ажил олгогч, үйлдвэрчний эвлэлээс Нийгмийн даатгалын үндэсний зөвлөлийг бүрдүүлдэг. Гэтэл энэ хүмүүс нь нүд нь балай, чихээ таглаа учраас Нийгмийн даатгалын санг эрсдэлд оруулсан. Тэр хүмүүс хариуцлага хүлээх ёстой. Найзан дундаа, ар өврийн хаалгаар хүн оруулж ирдэг асуудал цаашид байхгүй. Үндэсний зөвлөлөөс хамаг юм болсон шүү. “Мана” гээд гээд явуулж байхад хамтарч хулгайлсаар байгаад Нийгмийн даатгалын сан өсч, арвижихгүй байна.

Нийгмийн даатгалын сан, Эрүүл мэндийн даатгалын сан бол даатгуулагчдын хөрөнгө. Үүний үр ашиггүй зарцуулалт, хяналтгүй байдлын улмаас олон ч хүн шоронгийн хаалга татлаа. Олон ч хүн үүнтэй холбоотой асуудалд нэр холбогдлоо. Цаашид энэ байдлыг эцэслэж ил тод байлгах шаардлагатай” гэдгийг онцоллоо.