УИХ-ын нэгдсэн чуулганаар Нийгмийн даатгалын үндэсний зөвлөлийн зарим гишүүнийг чөлөөлөх, томилох тухай асуудлыг хэлэлцэх үеэр УИХ-ын гишүүн Х.Булгантуяа “Нийгмийн даатгалын мөнгийг Капитал банканд байршуулаад их хэмжээний мөнгө алдсан. Нийгмийн даатгалын мөнгийг Капитал банканд байршуулах шийдвэрийг гаргахад оролцсон хорооны гишүүдээс өнөөдөр үргэлжлүүлэн ажиллаж байгаа хүмүүс байгаа юу. Тухайн үед энэ шийдвэрийг гаргахад оролцсон хүмүүст хариуцлага тооцсон уу” хэмээн асуулаа.

Дээрх асуултад Нийгмийн бодлогын байнгын хорооны дарга М.Оюунчимэг “Нийгмийн даатгалын байнгын хороон дээр үндэсний зөвлөлд нэр дэвшээд орж ирсэн асуудлыг нэг удаа буцаасан. Учир нь гурван талт механизмийг шаардлага, босго өндөртэй байлгах тал дээр хариуцлагатай хандахгүй бол нэр дэвшээд орж ирж байгаа хүмүүс нь ч бас шаардлага хангахгүй, нөгөө талаасаа Капитал банктай холбоотой асуудалд тухайн үед нэр холбогдсон үндэсний зөвлөлийн гишүүдийн бүрэн эрхийн хугацаа нь дуусаагүй байгаа.  

Үйлдвэрчний эвлэлүүдээс төлөөлөл орж ирж байгаа учраас дээрх  алдааг дахин давтахгүйн тулд шударга ажиллаж чадах хүмүүсийг нэр дэвшүүлсэн гэж найдаж байна.  АТГ-т нэр дэвшсэн хүмүүсийн мэдээлэл очдог, тэр үед нь шалгуур шаардлага хангаж чадаж байгаа эсэх, дээрх асуудалд өмнө нь шалгагдаж байсан эсэх дээр илүү хариуцлагатай хандаж байгаа. Капитал банктай холбоотой асуудал шүүхийн шатанд яваа” хэмээн хариулав.