Нийслэлийн Засаг даргын орлогч Т.Даваадалай цаг үеийн асуудлаар сэтгүүлчдэд мэдээлэл өглөө.

    Тэрбээр “438 тэрбумаар нийслэлийн орлогыг нэмэгдүүлж, таван их наяд 385 тэрбум төгрөг болж байна. Орлогыг нэмэгдүүлж байгаа гол шалтгаан нь 2026 оны наймдугаар сард Монгол Улсад болох COP-17 олон улсын НҮБ-ын конвенцийн хурлын барилга байгууламжын үйлчилгээний зардал дээр 70.1 тэрбумыг Үндэсний хорооны даргаас нийслэлийн Засаг дарга, ажлын хэсгийн даргад үүрэг болгосны дагуу шийдвэрлэж байгаа” гэв. Үргэлжлүүлэн сэтгүүлчид түүнээс дараах асуултад хариулт авсан юм.

-Төлөөлөгч нар яагаад тодорхойгүй төслүүдийг урдаа барьж нийслэлийн төсвийг тодотгоод байна вэ?

  -Мэдээж Ардчилсан намын 45 төлөөлөгчдөөс зарим нь улс төржих асуудал бий. Гэхдээ бид олон улсын өмнө хүлээсэн арга хэмжээтэй. Энэ зун “Дэлхийн адууны өдөр”, “COP”, “Даншиг наадам”, “Дэлхийн эдийн засгийн форум” зэрэг арга хэмжээтэй. Зургаа, долоо, наймдугаар сар гэдэг бол олон улсын гадаад зочдыг хүлээж авах, аялал жуулчлалын нэлээд идэвхтэй үе. Дээрээс нь бүтээн байгуулалтын ажлыг гуравдугаар сарын 15-наас эрчимжүүлэх шаардлагатай.

-70 тэрбумыг юунд зарцуулсан бэ?

       -Дотроо таван үйл ажиллагаа хариуцсан. Хамгийн өндөр зардал нь 24 тэрбум COP-ын цэнхэр бүст байгаа 12 барилгыг түрээслэх, COP хурлыг зохион байгуулах НҮБ-ийн конвенцийн дагуу цэнхэр бүсийн 12 барилгыг түрээслээд барих үндсэн дэд бүтэцтэй. Дээрээс нь доторх тавилга тохижилт гэх мэт зүйлд зарцуулна.

- “Улаанбаатар транбай” төсөлд 350 тэрбум төгрөг гээд яригдаж байна лээ.

    -Хоёр жилийн хугацаатай хэрэгжих боломжтой төсөл юм. Хан-Уул дүүргийн иргэд хоёр дахин ихэссэн.  Улаанбаатар хотод 107 ширхэг 11 чиглэлийн автобус өдөрт 45 мянган зорчигч тээж, ойролцоогоор 200 мянган автомашин Хан-Уулын чиглэлд Сүхбаатарын талбайгаас Чингисийн өргөн чөлөө, Буянт ухаа чиглэлд явж байгаа. Энэ чиглэлийн замын хөдөлгөөний түгжрэлийг бууруулах богино хугацааны үндсэн ач холбогдолтой төсөл бол “Улаанбаатар трамбай” юм. Энэ төслийг сэлбийн борлуулалтын эх үүсвэрээр Улаанбаатар хотын орлогыг нэмэгдүүлж, урьдчилгаа төлбөрийг 2026 онд хийхээр төлөвлөсөн.

- “Улаанбаатар трамбай” төсөл хэзээ ашиглалтанд орох вэ?

     -Трамбай төсөл хэрэгжих хугацаа шалгарснаас хойш 24 сар гэсэн тооцоололтой байгаа.

-Өнөө өглөө цахим орчноор “Энх тайвны гүүр”-тэй холбоотой асуудал яригдаж байна. Насжилт, хэзээ засах, нурахад бэлэн болсон байна гэх эрсдэлтэй асуудал яригдаж байсан.

         -“Энх тайвны гүүр” насжилт хэтэрсэн. Мэргэжлийн байгууллын дүгнэлтээр ойрын хугацаанд засварлах, нэмэлт хүчдэл хийх шаардлагатай гэдэг дүгнэлт гарсан юм билээ. Тийм учраас “Энх тайвны гүүр”-ийг трамбайны шугамтай уяалдуулан засварлахаар төлөвлөсөн.

-Нийслэл 200 тэрбум төгрөгийн бонд гаргах гэж байгаа шүү дээ. Энэ хэзээ гарах вэ. Тавдугаар цахилгаан станц хэзээ ашиглалтанд орох вэ?

        -2025 онд Улаанбаатар хотын хэмжээнд төрийн хөгжлийн түншлэлээр шалгарсан чухал төсөл бол тавдугаар цахилгаан станц байгаа. Энэ станцын төсөл нь Улаанбаатар мега төслүүдийн ач холбогдлын хувьд нэгдүгээрт эрэмбэлэгдсэн. Тийм учраас Улаанбаатар 20 хувь дээр хөрөнгө оруулалт хийж , 80 хувийг хувийн хэвшил өөрсдөө гаргахаар хуулийн дагуу дөрвөн үе шаттайгаар 2025 онд шалгарч гэрээлсэн. 2026 оны Улаанбаатар хотын 20 хувийн хөрөнгө оруулалтын шаардагдах 200 тэрбумыг бондын хэлбэрээр босгоод хийж байна. Ажил эхэлчихсэн явж байгаа, шалгарсан компани бол турбин, зуух, генератор гэдэг үндсэн хийцлэлүүдийн захиалгыг өгсөн. Ажлын зураг 40 хувийн гүйцэтгэлтэй явж байгаа, талбайн бэлтгэл ажил графикийн дагуу явж байгаа.

-Дүүжин тээвэр ахицтай явж байгаа юу?

          -Дүүжин тээвэр бол хуваарийн дагуу явж байгаа. Нэгдүгээр хагаст барилга угсралтын ажлаа дуусгаад хоосон туршилт явуулна, харин хоёрдугаар хагаст ашиглалтанд орно. Ачаалалтай туршилтыг ойролцоогоор 3-6 сарын хугацаанд хийдэг. Арав, арваннэгдүгээр сар гэхэд зорчигчдоо авна гэж төлөвлөж байгаа.

-Дүүжин тээвэр хэдэн төгрөгийн төсөвтэй вэ?

         -Нэгдүгээр үе шат нь 48 сая паунд.