УИХ-ын гишүүн Ч.Лодойсамбуу цаг үеийн асуудлаар сэтгүүлчдэд байр сууриа илэрхийллээ. Тэрбээр "2019 оны Үндсэн хуулийн өөрчлөлтөөр Засгийн газар Ерөнхий сайдад онцгой эрх өгсөн. Засгийн газрынхаа бүтэц бүрэлдэхүүнийг өөрөө шийд. Өөрөө сайдаа томил, өөрөө асуудлаа үүр гэж ачааг нь үүрүүлсэн. Тэгэхээр асуудлаа Ерөнхий сайдтай л ярьна. Г.Занданшатар сайд ажлаа хийхгүй байна. Манай намын бүлэг Ерөнхий сайдыг огцруулах бүлгийн шийдвэр гаргасан бичиг байгаа. Айл гэж үзвэл манай улс гал алдчихаад байна. Энэ айлыг хэн хариуцах вэ гэвэл Ерөнхий сайд. Түүнээс салбар хариуцсан нэг сайд руу чулуу шидээд өнгөрөх асуудал биш. Айлыг өрхийн тэргүүнтэй л ярьдаг шүү дээ" гэв.

         Мөн түүнээс сэтгүүлчид УИХ-ын гишүүний ёс зүйн асуудлын талаар асуухад "Аливаа асуудлыг харахдаа эмэгтэй гишүүд ч юм уу эсвэл жагсаалт буруутай юм шиг болоод байна. Бүх зүйл хуультай шүү дээ. Тухайлбал, доромжуулсан хүнээ шүүхэд өг л дөө. Тэр нь УИХ-ын гишүүн байна уу хамаагүй шүү дээ. Бид чинь хуулийн өмнө бүгдээрээ эрх тэгш эрхтэй. Зөвхөн төрийн нэг хэсэг гэдэг утгаараа орон байр, унаа хөсөг нь халдашгүй байна гэсэн болохоос бусдаар шүүхэд өгч болно шүү дээ. Тэгэхгүйгээр УИХ-ын гишүүн гэж тусдаа хүн гэж өөрсдөө хүлээн зөвшөөрөөд байдаг" гэсэн юм.