Засгийн газрын ээлжит хуралдаан өнөөдөр боллоо.

     Энэ үеэр Цахим хөгжил, инновац, харилцаа холбооны сайд Э.Батшугар "Манай яамнаас нийт төрийн үйлчилгээнд тооллого хийсэн. Ингэхдээ төрийн үйлчилгээний хэдэн хувь нь цахимжсан тоог гаргалаа. Энэ хүрээнд нэгдсэн системтэй болж байгаа. Монгол Улсад 1392 төрийн байгууллага 3189 төрийн үйлчилгээ олгодог байна. Үүний 77 хувь нь цахимжсан байна. Нэн шаардлагатай цахимжуулаагүй 822 үйлчилгээ байна. Тэгэхээр нэн тэргүүн бодлогын дагуу төрийн үйлчилгээний 90 хувийг цахимжуулах зорилго тавьчихсан, шат дараатайгаар цахимжуулаад явна. Мөн үүнтэй холбоотойгоор Засгийн газарт орсон хэд хэдэн асуудал байна. Зарим төрийн үйлчилгээ Хур системээр дамжихгүй байгаа юм байна. Иймд цаашид үйлчилгээнүүдээ үе шаттайгаар Хур системээр дамжуулан цахимжуулах бөгөөд төр өөрт байгаа мэдээллээ иргэнээс нэхэхгүй байх нөхцөл үүснэ. Түүнчлэн Ашигт малтмалын үр ашгийн 60 хувийг ард иргэдэд олгохтой холбоотойгоор E-Mongolia дээр хяналтын самбарыг хөгжүүлнэ. Энэ нь ил тодоор тухайн компанийн хэдэн хувь нь АМНАТ, татвар, ногдол ашиг байгаа болон танд ямар шугамаар яаж ирж байгааг харуулах зорилготой. Мөн төр, хувийн хэвшлийн түншлэлийн хүрээнд Zangia.mn сайттай хамтран E-mongolia дээр ажлын байрны цэстэй болж, иргэн сонирхсон ажлын байрныхаа хүсэлтийг E-mongolia-гаар дамжуулан өгөх бөгөөд Zangia.mn дээр нээлттэй байгаа 20.000 мэдээллийн санд боловсруулалт хийж танд тохирсон ажлын байрыг санал болгох юм байна" гэв.