Эрчим хүчний сайд Б.Чойжилсүрэн мэдээлэл өглөө. Тэрбээр "Эрчим хүчний яам цахилгааны асуудлыг 100 хоногт багтаан дангаараа шийдэж дийлэх юм уу үгүй юм уу гэдгийг шударга хүлээн зөвшөөрөх хэрэгтэй. Энэ ганц өнөөдөр үүссэн зүйл биш шүү дээ. 2022 оны наймдугаар сарын 30-наас хойш л Эрчим хүчний сайдаар ажиллаж байна. Түүнээс хойш бага багаар асуудлыг шийдэж байна. Тарифын хүндрэлтэй асуудал ч бий. Тийм учраас Засгийн газрын Хэрэг эрхлэх газрын дарга С.Бямбацогтоор ахлуулсан Ажлын хэсэг байгуулах шийдвэр өнөөдөр гарлаа. Эрчим хүчний салбар өөрөө чадлын дутагдалд орсон байна. Хэрэв цахилгааны хязгаарлалт хийхгүй бол систем тэг зогсож илүү хүндрэл үүснэ. Энэ асуудлыг шийдэхийн тулд ТЭЦ-5 дулааны цахилгаан станцыг тендер зарлуулсан. Эрчим хүчний яам дээр санхүүгийн бололцоо байхгүй болохоор Нийслэлийн Засаг даргын тамгын газар дээр шилжүүлээд, Монголын талын оролцоог орон нутгийн төсвөөсөө гаргаад, тендер зарлуулах шийдвэр гаргаад явж байна. НЗДТГ дээр тендер шалгарсан. Одоо шалгарсан хөрөнгө оруулагчдаа тусгай зориулалтын компани нийслэл дээр байгуулагдсаны дараа ажлууд өрнөнө. Улаанбаатар хотын зүүн хэсгийн дулааныг Амгалан дулаан станцын зүүн талд 2.5 га газар бий. Энэ газар дээр "Амгалан дулаан-2" гэсэн ТЭЗҮ боловсруулчихсан байгаа" гэв.

Тэрбээр мөн сэтгүүлчийн "Засгийн газрын хуралдаанаар танд 100 хоногийн хугацаатай үүрэг өгсөн байна. Та энэ хугацаандаа амжаад энэ асуудлаа шийдэж чадах уу. Чадахгүй бол та явах уу" гэх асуултад "100 хоногт асуудлыг шийдэж чадахгүй. Ажлаа өгөх ёстой бол өгнө. Сайдын суудалтай зууралдаад байсан зүйл үгүй. Энэ албан тушаалыг өгч чаддаг, авч чаддаг байх ёстой гэсэн байр суурьтай байдаг" гэсэн юм.