Хэн бүхний даваад гарч чадахгүй олон зүйлийг туулах тэвчээртэй “16-тай ээж”, “ Мөрч” олон ангит киноны Агийн хайртай бүсгүй гээд үзэгчдийн сонирхлыг татсан уран бүтээлүүдэд тоглосон Э.Төгсжаргалтай ярилцлаа. СУИС-ийн оюутан түүний тоглосон анхны уран бүтээл нь “Амьдрал” олон ангит кино байсан билээ.

-Танд энэ өдрийн мэнд хүргэе. “16-тай ээж” киног үзэхдээ охинтой хамт хүүхдийнх нь төлөө тэмцэж, хамтдаа байсан үзэгчид байхад “Буруу зүйлийг уриалж байна” гэж шүүмжлэх ч хүмүүс байсан шүү дээ. Уран бүтээлчийн хувьд тэдгээр шүүмжийг унших ямар сэтгэгдэл төрж байв?

              -Үзэгчидээс эерэг, сөрөг олон сэтгэгдэл ирсэн. Ямар нэгэн уруу татсан зүйл дэлгэрүүлээгүй шүү дээ. Тухайн үйл явдлыг зөв, буруу гэж огтхон ч шүүгээгүй. Сэрэмжлүүлэх “ийм эрсдэл үүсэжмагадгүй шүү” гэдгийг л “16-тай ээж” кино харуулна. Хүн бүрийн амьдрал өөр, тэдний туулж яваа түүх, хувь заяа нь өөр байгаад бусдыг шүүмжилж, гол дүрийн охиныг буруутгаж байгааг харах таагүй байсан. Хүмүүсийн сэтгэгдлийг төдийлөн уншаагүй ээ. Бүгдийг нь уншвал дийлдэхгүй юм билээ.

-Бодит түүхээс сэдэвлэн бүтээсэн учраас илүү сэтгэл хөдөлсөн болов уу. Түүхийн жинхэнэ эзэнтэй уулзсан бол юу гэж хэлэхийг хүссэн бэ?

              -Бодит түүхээс сэдэвлэсэн гэдгийг нь мэдсэнийхээ дараа зохиолоо бүрэн уншиж дуусаад сэтгэл хүнд болсон. Хүний амьдрал тааварлашгүй, хэцүү гэдгийг мэдэрсэн. Ямар их тэвчээр, зориг вэ. Хэрэв би түүний оронд байсан бол ганцаараа тэр бүхнийг давж гарч чадахгүй байсан байх. Түүхийн жинхэнэ эзнээр бахархаж кинондоо тоглосон доо.

-Өмнө нь ажилласан уран бүтээлүүдээс нь огт өөр дүр байлаа шүү дээ. 16 настай ээжийн дүрд ажиллах ямар байв. Хамгийн хэцүү байсан   зүйл нь юу вэ?

              -Тийм ээ, шинэ шалгуур байлаа. Жирэмсэн эмэгтэйн дүрд тоглож байгаа учраас хэрхэн алхахаа хүртэл бодсон. Өөрөөсөө залуу бүсгүйн дүр, тэр тусмаа ээжийн дүр учраас бодож, судлах зүйл олон байлаа. Уйлдаг зураг авалтын дараа өөр хэсгийн зураг авах үе нүд хавдчихдаг учраас жаахан хэцүү байсан. Тэр дундаас төрөх хэсгийн зураг авалт хамгийн хэцүү байсан. Жүжиглэж байгаа хэрнээ л их ядарсан учраас жинхэнээсээ төрөхөөс айсан.

-Кино багийнхан уран бүтээлээрээ дамжуулж үзэгчдэд хүргэх гэсэн санаагаа хүргэж чадсан болов уу?

              -Миний хувьд хэлэх гэсэн санаагаа үзэгчдэд хүргэсэн гэж бодож байгаа. Хүмүүс өөрсдийн харах өнцгөөр ямар нэгэн зүйл ойлгож, ухаарсан байх.

-Өөрөө хараахан ээж болж амжаагүй байгаа шүү дээ. Ээжийн дүрд ажиллах ямар байсан бэ?

              -Ээж бол амжаагүй байгаа учраас төрөх үед юу болдог талаар мэдэхгүй шүү дээ. Тиймээс зураг авалтаас өмнө эгч рүүгээ залгаж, асуусан. Эхийн сэтгэлийг дутуу гаргачих вий гэж их санаа зовсон доо.

-Үзэгчдийн сонирхлыг татаж байгаа “Мөрч” олон ангит киноны Агийн хайртай бүсгүйн дүрд тоглож байгаа шүү дээ. Түүхэн уран бүтээлд ажилласан сэтгэгдлээсээ хуваалцахгүй юу?

              -“Мөрч” олон ангит кино тун удахгүй үзэгчдэд хүрч дуусна. Түүхэн уран бүтээл учраас огт өөр ертөнцөд очсон юм шиг санагдсан. Ном, зохиолоос уншиж төсөөлдөг байсан үедээ очоод ирсэн юм шиг. Эдлэл хэрэглэл, хувцас, үг ярианаас нь эхлээд бүгд сонирхолтой санагдаж, шинэ туршлага хуримтлуулсан. Кино багийнхаа хамгийн бага нь байсан учраас туршлага багатайг минь ойлгож, бүгд зааж, зөвлөсөн. Энэ боломжийг ашиглаад багийнхандаа баярласнаа илэрхийлэхийг сацуу бүгдэд нь баяр хүргэмээр байна.

-Хүн бүр л танаас Агийн хэн алсныг асууж байна уу?

              -Тийм ээ, олон хүн асууж байгаа. “Хэн алсныг нь хэлэхгүй, өөрсдөө үзээрэй” гэхээр дахин асуугаад байгаа учраас зарим хүнд “Зохиолоо бүрэн уншаагүй учраас мэдэхгүй” гэж хэлсэн.

-“Илбийн хайр” киноны талаар ярихгүй юу, гэгээн хайртай учирсан эмэгтэйн дүр шиг санагдсан?

              -“Илбийн хайр” кинонд хүн бүрийн хайрыгтатсан хөөрхөн охины дүрд тоглосон. Дүр минь надаас нэлээн өөр эмэгтэй. Миний өмсдөггүй хувцас, өмнө нь хэлж байгаагүй үгийг хэлдэг. Гэхдээ тоглож хүсэж байсан дүрдээ тоглосон.

-Жүжигчин болох шийдвэрийг хэзээ гаргаж байв. Яагаад энэ салбарыг сонгосон юм бэ?

              -Би таван настайдаа сургуульд орсон хэрнээ их тод, чанга ярьдаг байсан юм. Бага ангийн багшийнхаа санал болгосноор уран уншлагын тэмцээнд ороод түрүүлчихсэн. Тэгээд сургуулийнхаа бүх л үйл ажиллагаанд ордог болсон. Оролцох бүрдээ улам дуртай болж, жүжигчин болохоор шийдсэн. Телевиздээ наалдчихаад гарч байгаа кино, жүжгийг шимтэн үздэг хүүхэд байлаа.

-СУИС-д сурдаг шүү дээ. Хэзээнээс уран бүтээлд ажиллаж эхэлсэн бэ?

              -Өнгөрсөн намар хамгийн анхны уран бүтээл болох “Амьдрал” олон ангит кинондоо тоглосон. Тэр үед “Мөрч” киноны зураг авалт ч эхэлсэн учраас хоёр кинондоо зэрэг тоглосон доо.

-Анхны уран бүтээлээс гадна хоёр олон ангит киноны зураг авалтад зэрэг оролцож явах ямар байсан бэ, ачаалалтай байсан байхдаа?

              -Ачаалалтайгаас гадна анхны уран бүтээл учраас “Чадах болов уу” гэсэн айдас байсан. Ядарч байсан ч сайхан дурсамж бүтээгээд олон зүйл сурахыг хичээсэн.

-Өөрийнхөө тоглосон киногоо үзэх ямар байсан бэ?

              -Өөрийнхөө алдааг шүүж, хайж үздэг юм билээ. Заримдаа өөрийгөө харж ичнэ, болдог бол алдсан хэсгүүдээ, сэтгэлд хүрээгүй хэсгүүдээ засчихмаар санагдсан.

-Ямар дүрд тоглохыг хүсдэг вэ?

             -Тулаантай, адал явдалтай киноны дүрд өөрийгөө сорьж үзэхийг хүсэж байгаа.

-Таны дараагийн зорилго, төлөвлөгөө юу вэ?

              -Сургуулиа амжилттай төгсөөд сайн уран бүтээлч болохыг хичээж байна.