УЛСЫН МӨНГИЙГ ЧИМЭЭГҮЙ "ИДДЭГ" ХАМГИЙН ТОМ МАФИ БРОДЮРЫН БҮЛЭГЛЭЛ БОЛСОН ГЭНЭ

  Нийслэлийн дарга нар жил бүр бродюр сольж, явган хүний зам засдаг ажилтай. Эвдэрсэн, эвдрээгүй хамаагүй солиод л байна солиод л байна. Хуучныг шинээр солилоо гээд явган хүний зам сайжирсан зүйл ер үгүй. Жил бүрийн яг өдийд автозамын засвар, шинэчлэлийн ажил ундардаг. Зарим нь данхаар хар тос цутгаад л эхэлнэ. Үүнтэй зэрэгцээд бродюр, зам засварын асуудал дуусахгүй шүүмжлэл дагуулдаг. Хамгийн сонирхолтой нь, автозамынхан өнгөрсөн жил зассан бродюраа энэ жил дахиад л сольдог гэнэ. Учир нь Нийслэлийн Замын хөгжлийн газрынхны  хамаарал бүхий этгээдүүдийн компани ямар ч өрсөлдөгчгүй тендер авч, "Амташсан хэрээ 13 дахина" гэдэг шиг жил бүр автозамын бродюр солих нэрээр мөнгө идээд сурчихсан байдаг гэх.

Тэдний энэхүү мөнгө угаах аргыг хэн ч анзаардаггүй иргэд жил бүр автозам засаж, бродюр сольж байвал сайн гэж боддог. Гэтэл улсын мөнгийг чимээгүй иддэг хамгийн том мафи "Бродюр солино" гэх хоёрхон үгний цаана бужигнадаг байна. Энэ жил бүр 45.6 тэрбум төгрөгөөр явган хүний зам солино хэмээн НИТХ-ынхан төсөв хэлэлцэх үеэрээ ярьсан. Солиогүй удсан, хуучирсан, хамуурч элэгдсэн замыг сольж болно. Хамгийн гол нь, чанартай зам барих хэрэгтэй байна, хотынхоон. Өвлийн улиралд зам дээр давс, бодис цацаж, хамууруулна. Дээрээс нь хүрз, жоотуу, төмрөөр нүдэж халзалж, хагалдагаа тооцоолж, олигтойхон зам барьчихвал хэн хэндээ амар л байна. Өөрөөр хэлбэл дор хаяж 10 жил гар хүрэхээргүй, дахиж хөндөхөөргүй болтол нь явган хүний замаа сайжруулах хэрэгтэй байна гэсэн үг. Гэхдээ жилийн явган хүний зам солих ажилд 45.6 тэрбум төгрөг зарцуулна гэх асуудалд иргэд шүүмжлэлтэй хандаж байгаа. Нийслэлийнхэн зам солино гэх нэрээр сонгуулийн мөнгө босгох гэж байна. Үүнийг болиулах хэрэгтэй. Сонгуулиас өмнө зам засах ч хэрэггүй хэмээн үзэл бодлоо илэрхийлж байгаа буруу зүйл биш. 

ӨВӨЛ ЦАЦДАГ ДАВС, БОДИСУУД БРОДЮРЫГ ЭЛЭЭЖ, ХАМУУРУУЛДАГ УЧРААС СОЛЬДОГ 

     . Цас хайлуулахад цацдаг бодис бетонон хашлагыг эвдэж, элэгдүүлдэг. Манай улс ихэнхдээ бетонон бродюр хэрэглэдэг. Тэр нь цас хайлуулах бодис давс цацсантай холбоотойгоор ашиглах хугацаа нь богиносдог. Зам ашиглах, засах хугацаа богиносох бүрд  хэдэн тэрбум төгрөгийн тендер зарлаж, мөнгө угаадаг. Үнэхээр засвар хийгээгүй 10, 20 жил болсон автозамыг засаж, мөнгө зарцуулалгүй яах вэ. Харин яагаад заавал солих шаардлагагүй автозамын бродюрыг жил бүр солиод байдаг юм бэ. Иргэд ч жил бүр бродюр сольдог асуудалд бухимдалтай ханддаг. Тухайлбал олон нийтийн сүлжээгээр “МАН-ынхан засаг барьж байхад жил бүр бродюр сольж, төсвийн мөнгө завшдаг дарга нарыг ил болгох хэрэгтэй. Нийслэлийн автозамын хөгжлийн газрын дарга нарын хамаарал бүхий этгээдүүдийн компани тендергүйгээр ажил хэрэг болгож авчихаад хэдэн тэрбумаар нь иддэг” хэмээдэг.  Зарим нь “Нийслэлийн замынхан баян айлын эхнэр дээлийн өнгөө наадам бүрээр сольдог шиг бродюр, зам байнга солих юм” гэх мэтчилэн санал, сэтгэгдлээ илэрхийлдэг нь нууц биш.  Гэвч үүнийг тоож буй нэг ч хүн байдаггүй. Яг үнэндээ бидэнд бродюраас илүү сургууль, цэцэрлэг, эмнэлэг, цэцэрлэгт хүрээлэн, дугуйн зам хэрэгтэй байна. Эвдрээгүй бродюр солихоо болъё. Өмнөх хотын даргын үед бүр  давхарлаж тавьж байсан түүнийг нь битгий давтаарай.