Б.ДЭЛГЭРСАЙХАН ТҮГЖРЭЛ ШИЙДЭЖ ЧАДАХГҮЙ АРГАЦААСААР БАЙГААД СОНГУУЛЬТАЙ ЗОЛГОХ НЬ

         Түгжрэлийн сайдаас юу ч хүлээгээд нэмэргүй нь ээ. Хувийн бизнесээ өргөжүүлэхээс төрийн албанд ажиллаж чадахгүй юм байна. Одоогоор түгжрэл бууруулах талаар ямар ч төсөөлөлгүй яваа. Саяхан тойргийнхоо малчдад өвс, тэжээл зөөж, хүмүүсийн наана, цаана орж зургаа авхуулж яваа харагдсан. Хийнэ, бүтээнэ, чадна гэж сайд болчихоод сонгуулийн шоу хөөгөөд хөдөө явчихлаа. Нийслэлчүүдийн өдөр тутмын асуудал болсон түгжрэлийг хэзээ, хэрхэн шийдэх гэж байгаа юм бол. Хотыг бүхэлд нь сайхан болгож, цэгцэнд нь оруулдагүй юм аа гэхэд өдийд түгжрэл бууруулах нэг ч болтугай ажил яриад зогсмоор сон. Хотын түгжрэлийг яаралтай шийдүүлэх талаар нийслэлчүүд өдөр, шөнөгүй бухимдлаа илэрхийлж, амьдралынхаа хамаг цаг, эрч хүчээ зам дээр өнгөрүүлж байгаа тухайгаа цахим хуудсаараа дамжуулан хэлэх юм. Гэтэл хариуцсан сайд нь ганц ч алхам өөрчлөгдөж, сайжруулах арга хэмжээ авсангүй бүтэн таван сар боллоо.

Өнгөрсөн хугацаанд юу ч хийсэнгүй. Бүр тэгж л байдаг юм гэсэн шиг тоож байгаа шинж ч алга. Түгжрэл хэзээ ч буурахгүй, бууруулах арга хэмжээ авахгүй гэсэн шиг бүр цагаандаа гарсан бололтой юм. Б.Дэлгэрсайхан Улаанбаатар хотын автозамын түгжрэлийг бууруулах Үндэсний хорооны дарга болсон даруйдаа метроны төслийг богино хугацаанд хэрэгжүүлэх бүхий л арга замыг эрэлхийлж ажиллана. Түгжрэлийн сөрөг нөлөөллийг бууруулах гарц, шийдлийг хайж,  гарц, шийдлийг нэг бодлогийн дор зангидаж, цаг алдалгүй үр дүнд хүрнэ. Метротой болох ажилд хотын удирдлагууд үүрэг оролцоотой ажиллаж байгаад баярлаж байна. Метротой болчих юм бол түгжрэлийг бууруулах томоохон ажилд алхам болно. Метрог богино хугацаанд барих бүх арга замыг эрэлхийлж ажиллах болно” хэмээж байсан. Түүнээс хойш хийж хэрэгжүүлэх ажлынхаа талаар доривтой юу ч хийсэнгүй. Өлийн гурван сар замынхаа цасыг олигтой цэвэрлэж чадаагүй. Цэвэрлээгүй цасан дээрээ хэдэн хүнээр давс, бодис хүрздүүлсэн ч тэр нь нэмэр бололгүй иргэдийн хараалыг бараад дууссан. Нийслэлчүүд Б.Дэлгэрсайханыг сайд болсноосоо хойш олигтой ажил хийсэнгүй. Аргацаасаар байгаад сонгуультай золголоо хэмээн шүүмжлэлтэй хандаж байна. Өнөөдрийг хүртэл түүний гардаж аваад хийсэн гавьяа үнэндээ алга. Энэ л Б.Дэлгэрсайханы хийсэн ажил шүү дээ гэж ярих юм үнэндээ алга. Удахгүй улстөрчид малчидад царайгаа харуулж, цайг нь ууж дуусчихаад сонгуулийн өмнөхөн хотод ирэхдээ “Дараагийн дөрвөн жил хотыг түгжрэлгүй, утаагүй болгоно” гэж хэнэг ч үгүй том, том ярьж, мөрийн хөтөлбөртөө “Түгжрэлгүй Улаанбаатар, утаагүй хот” гэхчилэн мөрөөдлийн төлөвлөгөө боловсруулцгаан биз. Тэр цагт малчид зуданд, хотынхон түгжрэлд дарлуулж байснаа эргэн санах хэрэгтэй.. Нийслэлийн иргэд амьдралынхаа хамаг үнэтэй цаг хугацааг түгжрэлд барж байхад түгжрэлийн сайд Б.Дэлгэрсайхан түгжирч л байг гэсэн шиг зүгээр суугаа нь зүйд хэрхэн нийцэх вэ. Би ямар “Алтан загас”-ны өвгөн биш тавхан сарын дотор түгжрэлийг яаж бууруулах юм гэсэн ухааны юм бодоод сууж байгаа биз. 

ТҮГЖРЭЛИЙН САЙД НИЙСЛЭЛЧҮҮДИЙГ АВТОБУСАНД СУУЛГАЖ СУРГАНА ГЭСНЭЭС ӨӨР ОЛИГТОЙ АЖИЛ ХИЙСЭНГҮЙ

       Түгжрэлийн сайд Б.Дэлгэрсайхан өнгөрсөн арваннэгдүгээр сард “Нийслэлчүүдийг автобусанд суулгах соёлд сургана” хэмээн мэдэгдсэн. Түүнийг дээрх мэдэгдлийг хийсний дараахан Улаанбаатар хот тэг зогсолт хийж бүр гал тэрэг хүртэл түгжрэлд зогсож байсныг та бүхэн санаж байгаа биз.Түүнээс хойш ойрын үед түгжрэлээс салах гарц гаргалгаа байхгүй болсонтой нийслэлчүүд нүүр тулсан. Уг нь сонгуулиас өмнө түгжрэлийг бага ч болтугай бууруулчихвал сонгуульд нэр, нүүртэй баймаар сан. Гэтэл хотын дарга, түгжрэлийн сайд хоёр хотод хөдөлсөн болгоноос мөнгө хураана, хот руу орсон болгоныг богино хугацаанд гаргана гэхчилэн иргэдийн уурыг хүргэсэн мэдэгдэл хийж байсан. Тухайлбал,   хотын төв рүү нэвтрэхдээ “татвар” төлдөг байхаар хуулийн төсөл боловсруулаад УИХ дээр хэлэлцүүлж байна. Их хурал дээр эхний хэлэлцүүлгээр дэмжигдсэн уг хуулийн төсөл тун удахгүй батлагдах нь тодорхой байна. Хотын төвд Бага тойруу доторх хэсэг ирэх жилээс такстай болж, авто машинтай хүмүүс зүглэхээргүй болж байгаа нь энэ. Угтаа бол мөнгөтэй нэг нь хотын төвөөр холхиж, мөнгөгүй нь хотын төвд алхах хуулийн төсөл тун удахгүй Их хурлаар батлагдах гээд дуншиж байна. Төлбөртэй зогсоолын талаар Нийслэлийн Засаг дарга бөгөөд Улаанбаатар холтын захирагч Х.Нямбаатар "Хууль батлагдсанаар замын хөдөлгөөний төлбөртэй бүсийн тарифыг шууд тогтоохгүй. Нийтийн тээврийн хүртээмжийг сайжруулсны дараа тарифыг НИТХ тогтоохоор тусгасан. Төлбөртэй бүсийн тарифыг тогтоох бол 0-27000 төгрөг байна. 2000, 5000, 10000 төгрөг ч байж болно. Дэлхийн жишгээс харахад төлбөртэй бүс тогтоосноор түгжрэлийг 30 хүртэл хувиар бууруулсан туршлагууд бий. Замын хөдөлгөөний төлбөртэй бүс дотор амьдарч байгаа иргэдийг тогтоосон тарифаас 90 хувь хөнгөлнө. Жишээлбэл 1000 төгрөгөөр төлбөртэй нэвтрэх шийдвэр гарлаа гэхэд 100 төгрөг төлнө гэсэн үг. Бүсийг тойрсон автомашины зогсоолуудыг зөвхөн ажлын цагаар үнэгүй байлгана. Зогсоолын багтаамж хүрэлцэхгүй бол давхар зогсоол болгохоор төлөвлөж байна. Харин такси үйлчилгээг замын хөдөлгөөний төлбөртэй бүсэд 50 хувь хөнгөлөхөөр хуулийн төсөлд тусгасан" хэмээн тайлбарласан. Энэ нь Х.Нямбаатарын нөгөө шорвог шийдвэрүүдийнх нь нэг байх. Иймэрхүү байдлаар дарга нар хотын түгжрэлийг шийдэж чадсангүй. Хэнд нь ч түгжрэл бууруулах сэтгэл, гардаж хийх ажил байхгүй учир түгжрэлийн улам түгжиж байна.