БҮТЭН МОНГОЛ: Гаднынханд 100 жилээр газар эзэмшүүлэх асуудалд бүхэлд нь цэг тавьж, хуулиар хамгаалах ёстой

2024-02-23, 758

Гаднын иргэдэд газар эзэмшүүлж, ашиглуулах нь үндэсний аюулгүй байдал, тусгаар тогтнолын асуудлыг хөндөж байна хэмээн Ардчилсан нам болон УИХ дахв Ардчилсан нам, Ардчилсан залуучуудын холбооноос “Бүтэн Монгол” аяныг өрнүүлсэн. Улмаар Засгийн газраас Их хуралд өргөн мэдүүлээд байсан Хөрөнгө оруулалтын тухай хуулийн газартай холбоотой заалт Үндсэн хууль болон Газрын тухай хуулийг зөрчиж байна хэмээн эсэргүүцэж, хуулийн төслийг татан авах шаардлага хүргүүлж байлаа.

Тэгвэл Хөрөнгө оруулалтын тухай хуульд гаднын иргэнд газар эзэмшүүлж, ашиглуулахтай холбоотой одоо хэрэгжиж буй хуулийг хүчингүй болгох тогтоолын төслийг энэ хаврын чуулганаар хэлэлцүүлнэ гэдгээ УИХ-ын дарга мэдэгдээд буй.

Харин “Бүтэн Монгол” хөдөлгөөнөөс Хөрөнгө оруулалтын хуулиар гаднын иргэнд газар эзэмшүүлэх, ашиглуулах асуудлыг дахин хөндөхгүй байх эрх зүйн орчинг бүрдүүлэх шаардлагатай хэмээн мэдэгдлээ. Өөрөөр хэлбэл, Хөрөнгө оруулалтын тухай хуулийн газартай холбоотой заалтад гал унтраах байдлаар хандаж болохгүй хэмээн үзэж байгаа юм.

АН-ын дэд дарга П.ГАЛИНДЭВ

“БҮТЭН МОНГОЛ” хөдөлгөөн газар нутгаа хамгаалах асуудлаар сүүлийн найман сар бол тасралтгүй ажиллалаа. Газар нутгаа хамгаалах зорилгоор 100 жилээр гаднынханд өгөх заалтыг хүчингүй болгох ажлын хүрээнд 21 аймгаар тойроод үзтэл аль хэдийнээ Монголын газар нутгийн хамгийн их байгалийн баялагтай хэсгийг гадныханд өгчихсөн юм байна. Нийт Улсын хэмжээнд 2.2 сая га газар аль хэдийн гаднын иргэд, компаниудад очжээ. Гэхдээ хамгийн их баялагтай хэсэг нь шүү. Өмнөговь аймагт л гэхэд 400.000 га газраа гаднынханд өгчихсөн байна. Дундговь аймгийн 300.000 га газраа өгчихсөн байна. Дорноговь аймагт мөн адил 300.000 га газраа гаднынханд өгчихсөн байна.

Нийслэлийн АН-ын дарга Т.БАТЦОГТ

Монгол Улсын Үндсэн хуулийн 6.3-т бэлчээр болон тусгай хэрэгцээт газраас бусад газрыг зөвхөн Монгол Улсын иргэнд өмчлүүлж болно гэсэн ийм Үндсэн хуулийн заалт байдаг. Гэтэл 2023 оны наймдугаар сард Монгол Улсын Засгийн газрын 294 дүгээр тогтоол гарсан. Түүнд нийслэл Улаанбаатар хотын иргэдэд шинээр газар эзэмшүүлж, өмчлүүлж болохгүй гэж тусгасан байгаа.

Үүнээс болоод Улаанбаатар хотын иргэд өнөөдөр хуулиар олгогдсон эрхийнхээ дагуу газраа эзэмшиж, өмчилж чадахгүй байдалтай байгаа юм.

Улаанбаатар хотын иргэдийн нийт 14 хувь буюу 238.000 иргэн өнөөдрийн байдлаар газраа өмчилсөн байна. Гэтэл Улаанбаатар хот маань 1.7 сая иргэнтэй. Цаана нь 1.462.000 мянган иргэн өнөөдөр хуулиар олгогдсон газраа өмчлөх, эзэмших эрх нь хаагдсан хэвээр байна.

Тэгвэл Ч.Хүрэлбаатар тэргүүтэй нөхдүүд өнөөдөр Монгол Улсын газар нутгийг гаднынханд “ХӨРӨНГӨ ОРУУЛАЛТ” нэрээр хэдэн зуун сая га газраар нь эзэмшүүлэх, 100 жилээр өгөх хуулийг санаачлаад явж байна. Яг энэ асуудлын хүрээнд өнөөдөр Улаанбаатар хотын хэмжээнд бид зах, худалдааны төв, олон нийтийн газруудаар урвасан нөхдүүдтэй бид тэмцэл өрнүүлж “БҮТЭН МОНГОЛ” хөдөлгөөн өрнүүлээд ажилласан.

УИХ-ын гишүүн А.АДЪЯАСҮРЭН

УИХ-ын намрын чуулганы төгсгөлөөр Ч.Хүрэлбаатар нарын санаачилсан “Хөрөнгө оруулалтын тухай” хууль гэдэг халхавчтай газрын хууль орж ирсэн байгаа. Үүнийг бид эсэргүүцсэн. Ард түмнийхээ хүчээр эсэргүүцэж, бид энэ хуулийн хулгайг түр зуур зогсоож чадлаа.

Эдийн засагч Х.БАТСУУРЬ

Монголын стратегийн ач холбогдол бүхий салбаруудад тухайлбал уул уурхай, банк санхүү, харилцаа холбооны салбарт гадаадын хөрөнгө оруулалт хийх юм бол Засгийн газраас зөвшөөрөл авна гэж байгаа юм. Гэтэл бүхэл бүтэн зөвшөөрөл авах энэ хэсгийг бүр мөсөн аваад хаячихсан байгаа юм. Нөгөөтэйгүүр шинэ оруулж ирсэн хуулиараа ямар ч мөнгө, хөрөнгөгүй гадны хүмүүсийг Монгол суурьшуулах зүйлийг хуульдаа шургуулчихсан. Түүнд 100 мянган ам.долларын босго байсныг аваад хаячихсан.

АЗХ-ны тэргүүн дэд ерөнхийлөгч О.ЗУНДУЙДОРЖ

Ч.Хүрэлбаатар бол Монголын төрд 16 жилийн хугацаанд УИХ-ын гишүүн байхдаа дандаа том төслүүд, том хуулиудад гол гарын үсгийг зурж, гол үүргийг зангидаж явдаг байсан. Өнөөдөр Монгол Улсын эдийн засаг яаж доройтсон, инфляц хэрхэн өндөр гэдгийг хүн бүр мэднэ. Хэн газраар оролдоно. Хэн байгалийн баялгаар оролдоно. Түүнийг нягтал, шалга гэдэг дээдсийн үг байдаг.

Тэгвэл өнөөдөр Ч.Хүрэлбаатар яг энэ цаг хугацаанд сонгуульд ахиж сонгогдохгүй мэтээр хамгийн сүүлийн боломжоо шахаж байна. Явах тусам зэс нь цухуйна гэдэг шиг. Шөнийн цагаар Монгол төрийн сайд хятадуудтай хөрөнгө оруулалтын талаар ярьж байна гээд албан ёсоор хэлж байгаа энэ үйлдэл нь хардах эрхийнхээ хувьд цэвэр энэ захиалгын хууль юм байна гэж харагдаж байгаа юм. Азаар Монголчууд маань энэ талаарх ойлголтыг маш богино хугацаанд мэдэж нэгдсэн. Ийм болохоор цахимаар 100.000 гаруй хүмүүс гарын үсэг зурсан. Цаасан дээр 600.000 гаруй хүн гарын үсэг зурсан. Энэ бол Монголчууд ямар дархлаатай, газар нутаг, эх орондоо эзэн байх чин эрмэлзэл бидний дотор байдаг юм гэсэн тодорхой үр дүн.

БҮТЭН МОНГОЛ: Гаднынханд 100 жилээр газар эзэмшүүлэх асуудалд бүхэлд нь цэг тавьж, хуулиар хамгаалах ёстой