УИХ дахь АН-ын бүлгээс малчдад зориулсан хандивын аян өрнүүлж байгаа талаар мэдээлэл хийж байна. Энэ талаар АН-ын бүлгийн дарга О.Цогтгэрэл "Орон нутагт малчдын асуудал хүнд байна. Хөдөө аж ахуйн салбарын асуудлыг харахад богино, дунд, урт хугацаанд юу хийх вэ гэдэг дээр анхаарал хандуулахгүй бол болохгүй болсон байна.

      Цаашлаад хөдөө аж ахуйн салбарт аргацаасан бодлого их явуулсны үр дүн харагдаж байна. Энэ цаг агаарын нөхцөл байдал малчдаас авч байгаа шалгалт биш. Төрөөс авч байгаа шалгалт юм. Өнгөрсөн хугацаанд мал аж ахуйн салбарыг сонгуулийн санал авахын тулд өнөө маргаашаа аргацаасан шийдвэр гаргасаар ирсэн нь харагдаж байна. Улаанбаатар хотын иргэдийг хямд махаар хангахын тулд махны үнийг барьж, экспортод гарах боломжийг нь хааж ирсэн. Үүний гороор малчид мөнгөгүй болж өвөлжилт, хаваржилтын бэлтгэлээ базааж чадсангүй" гэлээ.

УИХ-ын гишүүн Ж.Батсуурь "Өнгөрсөн намар налгар сайхан болж байгаад арваннэгдүгээр сарын 4-нөөс их хэмжээний цас орсон. Үүнээс хойш намрын чуулганы хуралдааны үеэр миний бие болон АН-ын гишүүд  30 гаруй удаа Засгийн газар Их хуралд санал хэлж байсан. Цэрэг штаб байгуулах, малыг тарган байгаа дээр бойлох, өвс тэжээлийг аймаг суманд хүргэх шаардлага байна гэж олон удаа мэдэгдэж байсан. Гэтэл нэргэсэн хойно нь хашхирав гэгчээр хэдэн хэвэг ачаад сайд нар нь матрын нулимс унагаад явж байна. Энэ жилийн зуд түүхэнд байгаагүй зуд. Гэтэл телевизийн мэдээгээр улсын хэмжээнд 600 мянган мал үхсэн гэсэн мэдээлэл ичихгүй тарааж байна. Үнэндээ Зөвхөн Сүхбаатар аймагт гэхэд нэг сая орчим мал үрэгдчихээд байна. Зүүн бүсэд 1-2 сая гаруй толгой мал хорогдсон. Харин Засгийн газраас "Шилэн зуд боллоо" гээд зургаан сайдаа явуулж байна. Гэтэл улс төрийн шинжтэй хүмүүс нь толгойлоод ажил хийдэг хүмүүс нь очихгүй байна" гэлээ.