Өвөлжлт, хаваржилт хүндэрч байгаатай холбоотой Засгийн газрын сайд нараар ахлуулсан тусламжийн цуваа хөдөө орон нутаг руу хөдөллөө.  Тодруулбал, өвөлжилт нэн хүнд байгаа аймаг, сумдад Улс, аймгийн нөөцөөс 20 мянга гаруй тонн өвс, тэжээлийг үнэгүй олгохоор болсны дагуу өнөөдрөөс орон нутаг руу тээвэрлэлт хийж байгаа юм. Малчдад туслах шуурхай зургаан бүлгийг Засгийн газрын сайд нараар ахлуулан байгуулж, орон нутгуудад ажиллуулахаар гарч байгаа юм.

Зудын эрсдэлийг бууруулахад чиглэсэн бүх талын арга хэмжээг Засгийн газар, Улсын онцгой комиссоос авч хэрэгжүүлж буй. Тухайлбал, отор нүүдэл хийж буй малчдад эрүүл мэнд, нийгмийн халамжийн үйлчилгээг тасралтгүй хүргэх, байгалийн гамшигт үзэгдлийн үед эрэн хайх аврах ажиллагааг шуурхай зохион байгуулахад шаардлагатай автомашин, шатахуун болон бусад бараа материалын зардал, аймгуудад улсын нөөцөөс өвс, тэжээл хямдруулан олгох, хаагдсан зам, давааг нээх, айл өрхийг нүүлгэн шилжүүлэхэд шаардагдах хөрөнгийг Засгийн газрын нөөц сангаас гаргахаар шийдвэрлэсэн билээ.