Засгийн газрын ээлжит бус өргөтгөсөн хуралданаар хөл хорионы дэглэмийг арванхоёрдугаар сарын 1 хүртэл буюу 14 хоногоор дахин сунгахаар болсон. Коронавирусийн халдвар дотоодод илэрсэнтэй холбоотой бүх нийтийн бэлэн байдлын зэрэгт шилжиж, хотоос гарах хөдөлгөөнийг хязгаарласан нь хөдөөнөөс нийслэлд ирсэн иргэдийн хувьд тулгамдсан асуудал болоод буй.

Шадар сайд Я.Содбаатар "Улаанбаатар хотод уулзалт, зөвлөгөөнд оролцохоор ирсэн орон нутгийн 500 гаруй иргэн байгаа. Хувийн ажлаар ирсэн олон хүн бий. Тэдний асуудлыг ойлгож байгаа. Гэхдээ орон нутгийн иргэдийг гаргалаа гэж бодоход нэг аймагт очоод халдвар тараачихвал яах вэ. Халдвар авсан 12 хүний ойрын хавьтлын 2000, дам хавьтлын 5000 гаруй хүн байна. Эхний ээлжинд энэ хүмүүсээс шинжилгээ авч дуусгах хэрэгтэй. 14 хоногийн хугацаанд хөдөө орон нутгийн иргэдийг  яаж гаргах вэ гэдэг асуудлыг судлаад журам гаргах ажлыг зохион байгуулна" хэмээн мэдэгдсэн.

Тэгвэл УИХ-ын гишүүн С.Бямбацогт өөрийн цахим хаягаар дамжуулан "Ирэх лхагва гаргаас нөхцөл байдал гайгүй бол тусгай дэглэмийн дагуу орон нутгийн иргэдийг нэг удаа нийслэлээс гаргах ажлыг зохион байгуулахаар болсон" хэмээн мэдэгдлээ.