УИХ-ын чуулганы нэгдсэн хуралдааныг Бүх нийтийн бэлэн байдлын зэрэгт шилжүүлсэнтэй холбоотой цахимаар явуулж байна. 

 

Гишүүд байгаа газраасаа цахимаар хуралдаанд оролцож байгаа бөгөөд 87 хувийн ирцтэй эхэллээ. Өнөөдрийн чуулганы нэгдсэн хуралдаанаар Монгол Улсын 2021 оны төсвийн эцсийн хэлэлцүүлгийг хийж, батлах юм.

 

Хуулийн төсөлтэй холбоотой гишүүд асуулт асууж, хариулт авч байна. Энэ үеэр АН-ын бүлгийн дарга Д.Ганбат онцгой нөхцөл байдалд чуулганы хуралдааныг явуулж байгаа тул хялбаршуулсан дэгээр явуулах зарчмын зөрүүтэй саналын томьёолол гаргалаа. Саналыг хуралдаанд оролцож буй гишүүдийн олонх дэмжсэнээр чуулганы хуралдаан хялбаршуулсан дэгээр үргэлжилж байна.

УИХ-ын гишүүн М.Оюунчимэг: Коронавирусийн халдварыг дотооддоо алдаж, нөхцөл байдал өөрчлөгдчихлөө. Ирэх оны төсөвт цар тахлын нөхцөл байдалтай холбоотой санхүүжилтийн асуудлыг тусгасан байгаа юу. Ковидын нөхцөл байдлаас шалтгаалж аж ахуйн нэгжийн орлого буурсан байгаа. Үүнийг анхаарах хэрэгтэй.

УИХ-ын гишүүн Б.Жавхлан: Ирэх оны төсөвт цар тахлыг хүндээр төсөөлөөгүй ч эрсдлийг тооцож  боловсруулсан. Хэрэв цар тахал хүндэрвэл иргэдийнхээ орлогыг хүүхдийн мөнгөөр дамжуулж тэтгэх зорилгоор  870 тэрбум төгрөгийг хүүхдийн мөнгөнд суулгасан. Үүнийг нь бид дэмжиж, төсөвт тусгасан мөнгийг хэвээр нь батлахаар оруулж ирсэн. 2021 онд цар тахлын эрсдэлийг тооцож, тодорхой нөөцтэй оруулж байгаа гэж ойлгож болно

УИХ-ын гишүүн Т.Доржханд: 2021 оны төсвийн баmлах нь зүйтэй. Дараа нь төсөвт тодотгол хийх шаардлагатай. Цар тахлын гурав дах давалгаа үүсэж болзошгүй гэдгийг судлаачид хэлж байна Ийм үед манайх хэт өндөр төсөөлөлтэй төсөв боловсруулсан. Хөгжлийн бэрхшээлтэй иргэдэд төсөвлөсөн 26 тэрбум төгрөгийг хэмнэж Их хурлын тамгын газрын ажилчдын цалин хөлсөнд өгсөн байна гэсэн мэдээлэл явж байна. Энэ ямар учиртай юм бэ.

УИХ-ын гишүүн Б.Жавхлан: Хөгжлийн бэрхшээлтэй хүмүүсийн мөнгөнөөс нэг ч төгрөг хасагдаагүй. Энэ жил хүүхдийн мөнгөнөөс гадна 68 нэр төрлийн халамж өгөхөөр болсон. Халамж хавтгайрсан гэж ярьж байгаа. Нийт халамжаас таван хувь буюу 26 сая төгрөгийг хэмнэж байгаа. Халамжийн чиглэлээр хуулийн шинэчлэл хийнэ. Хуулийн төсөл боловсруулж эхэлсэн.

УИХ-ын гигүүн Ж.Сүхбаатар: Банкны зээлтэй холбоотой асуудлаар нэлээд санал ирж байна. Барилга байгууламж, сумын төвийн соёлын төвийн барилгын ажлыг царцааж бусад асуудлаа шийдэж болохгүй юү.

Сангийн сайд Ч.Хүрэлбаатар: Ирэх жилийн хөрөнгө оруулалтын тухайд хэрэгжиж байгаа төслүүдийг зогсоож олобхгүй 2021 онд 447 төсөл хэрэгжихээс 887 тэрбум төгрөг төсөвлөсөн. Нөхцөл байдалтай холбоотой эхлээүгүй ажлыг хойшлуулж болно. Аль болох төсөв энэ чигээр нь явуулахыг эрмэлзэж байна.

УИХ-ын гишүүн С.Ганбаатар: УИХ-ын гишүүдэд хандаж 14 их наядыг тарьж ургуулах гэж байгаа биш. Татвар төлөгчийн мөнгийг үйлдвэрчний эвлэлийн холбоо, ажил олгогч эздийн холбоодтой зөвшилцөх шаардлагатай байсан.

УИХ-ын гишүүн Б.Жавхлан: УИХ-ын Төсвийн байнгын хороо бүх шатны хэлэлцүүлгийг хийсэн. С.Ганбаатар гишүүн ч ажлын хэсэгт ажилласан. Эцсийн хэлэлцүүлэг учраас нэмж санал авах боломжгүй.

УИХ-ын гишүүн О.Цогтгэрэл: Бид шинэ нөхцөл байдалд ажилладаг болох нь. Манай төсөвт орлого олох боломжоо багаар харж байх шиг байна. УИХ цаашид дата өгөгдөл ашиглаж орлогоо нэмэгдүүлэх боломжтой юу.

УИХ-ын гишүүн Б.Жавхлан: Орлогын тухайд бид нэлээд өөдрөг баталж байгаа. Орлогоос чамлахюм байхгүй. Нөхцөл байдлаас шалтгаалж ямар орлого нэмэгдэх, ямар нь хасагдахыг мэдэхгүй байна. Төрд байгаа дата өгөгдлийг судалж, орлого оруулж болох юм.