Ерөнхий сайд У.Хүрэлсүх, Шадар сайд Я.Содбаатар нараар ахлуулсан албаныхан өнөөдөр МХЕГ-ын үйл ажиллагаатай танилцлаа.
Энэ үеэр Ерөнхий сайд У.Хүрэлсүх “Монгол Улс коронавирусийн халдвар дотооддоо алдаагүй цөөн улсын нэг. Өнгөрсөн нэгдүгээр сараас хил, гаалиа хааж, урьдчилан сэргийлэх арга хэмжээ авсан. Монгол Улс ковидод бүслэгдсэн. Бид ковид гэдэг дайсантай хориглон хамгаалах тулалдаан хийж байгаа. Хүнд нөхцөл байдалд байлдааны ажиллагаа явуулж байна. Төрийн хяналт шалгалтын хуульд зааснаар Мэргэжлийн хяналтын байгууллага хууль тогтоомжийн хэрэгжилтийг бүх салбар чиглэлд судлан нэгтгэж, тэдгээрийг боловсронгуй болгох саналаа Засгийн газарт танилцуулах ёстой. Гэвч энэ ажил бүрэн хэрэгжихгүй байгаа.
Ингэснээр санхүүгийн хараат бус хөндлөнгийн шалгалт хийгдэхгүй байна. Үүнтэй холбоотой төсвийн зарцуулалт, төрийн өмчийн хадгалалт хамгаалалтад тавих хяналт суларсан. Санхүүгийн сахилга бат үүнийг дагаад суларч, татвар төлөгчдийн мөнгийг дураараа зарцуулдаг гажуудал үүсчихээд байна. Иймээс санхүүгийн хяналтыг мэргэжлийн хяналтын нэгдсэн тогтолцоонд буцаан шилжүүлэхийг үүрэг болгож байна. Хоёрдугаарт, МХЕГ 2013 оноос хойш барилгын ажил эхлүүлэх, үргэлжлүүлэх, зөвшөөрөл олгох ажиллагаанд оролцохоо больсон. Иймд олон чанаргүй барилга, зам баригдаж байна. Үүн дээр хяналт тавих хэрэгтэй. Гуравдугаарт, ашигт малтмалын ашиглалтын зөвшөөрөл эзэмшигчдийн жил бүрийн уулын ажлын төлөвлөгөөг хянаж баталгаажуулах ажлыг мэргэжлийн хяналтын байгууллагаас салгасантай холбоотой байгаль орчны бохирдол нэмэгдэж байгаа. Нөхөн сэргээлтийн ажил хийгдэхээ больсон.
Монгол төрийн өмчийг өөрийн мэт боддог, хуульгүй мэт ажилладаг нөхдүүд бий. Тэдэнд төр засаг, ард түмэн бий гэдгийг мэдүүлэх хэрэгтэй. Монгол төрийн цагдаа, хууль төрийн алба хаагч нар хэн нэгэн танхай балмад этгээдийн өмхий шүлс нь үсэрч байдаг нүүр биш. Монгол төрийн нүүр царай юм шүү. Ийм төрийн хууль биелүүлдэггүй танхай нөхдүүдэд төр төмөр нүүртэй гэж харуулж байх хэрэгтэй. Монголын төр хүчирхэг байх хэрэгтэй гэж би хэлдэг” хэмээсэн юм
У.Хүрэлсүх: Төрийн хууль биелүүлдэггүй танхай нөхдүүдэд төр төмөр нүүртэй гэж харуулах хэрэгтэй |
|