-ХАМГИЙН ОЛОН ЖИЛ АЖИЛЛАСАН УИХ-ЫН ГИШҮҮДИЙГ САЙД БОЛГОНО ГЭХ-

        “Энэ сайд болно, Тэр сайд болох байх” гэх бөхийн таавар шиг яриа олны дунд хүчээ авлаа. Тэдний яриагаар бол эртнээс хусагдах нь тодорхой хэмээгдэж байсан өнөө л ажил нь бүтдэггүй, амалсандаа хүрдэггүй ЗГХЭГ-ын дарга Ц.Нямдорж, Соёлын сайд Ч.Номин, Зам, тээврийн сайд Л.Халтар, Барилга хот, байгуулалтын сайд Б.Мөнхбаатар, Уул уурхай, хүнд үйлдвэрийн сайд Г.Ёндон, Байгаль орчин, аялал жуулчлалын сайд Б.Бат-Эрдэнэ нарыг солих нь тодорхой гэцгээж байна.

           Харин Засгийн газар дээрх эрхмүүдийг хэнээр, яаж сольвол өгөөжтэй байх шоогоо аль эрт буулгачихсан гэх. Хэрвээ Үндсэн хуульд нэмэлт, өөрчлөлт оруулах шийдвэр гарчих л юм бол УИХ-д хамгийн олон жил ажилласан гишүүдээ сайд болгох тохироо хийчихсэн, гишүүд нь бүр яараад сууцгааж байгаа гэх яриа бий. Тухайлбал, үүнд УИХ-ын гишүүн М.Оюунчимэг, Н.Учрал, С. Бямбацогт, Д.Сарангэрэл, Б.Саранчимэг, Ж.Мөнхбат, Х.Болорчулуун нар Л.Оюун-Эрдэнийн Засгийн газар багтах таамаг байгаа. Гэхдээ Засгийн газар хямралтай энэ үед ард түмнийхээ дургүйг хүргэчихгүй, Үндсэн хуулийн өөрчлөлтийг намдуухан өнгөрөөхийн тулд чулуу хөөлгөж байж мэдэх юм. Энэ бол мөн л МАН-ын үндсэн арга, хийдэг мэхүүдийнх нь нэг. Тодруулбал, шинэ сайд, дарга томилогдох бүрд жинхэнэ эзнийг нь тас нууж, зохион байгуулалттайгаар өөр хэн нэгний нэрийг барьж, ард түмний шүүмжлэл, шуугианыг хэсэг намдааж байгаад нууц хөзөрөө дэлгэдэг. Энэ аргаа ч олон удаа хэрэглэж байгаа. Тиймээс хэрвээ дан дээлтэй сайд нарыг давхар дээлтэй гишүүдээр солихоор болвол дээрх аргаа мөн л хэрэглэж байхыг үгүйсгэх аргагүй. 

-МАН-ЫН ҮНДСЭН АРГА, ХИЙДЭГ МЭХҮҮДИЙНХ НЬ НЭГ ЧУЛУУ ХӨӨЛГӨХ-

     Тодруулбал, 2020 оны долдугаар сард сайд нар нь давхар дээлтэй байх дөрвөн яам тодорсон гэх мэдээлэл гарч байсан. Тодруулбал, тухайн үед Шадар сайд, Засгийн газрын хэрэг эрхлэх газрын дарга, Хууль зүй дотоод хэргийн сайд, Сангийн сайд нар давхар дээлтэй байхаар ярьж байсан. Тухайн үед  Ерөнхий сайд асан У.Хүрэлсүх бүлгийнхээ хурал дээр “Үндсэн хуульд оруулсан нэмэлт, өөрчлөлтийн дагуу УИХ-аас дөрвөөс илүү сайд томилохгүй. Сайд нарын ганц, хоёрыг нь улираана. Бусад нь УИХ-ын гишүүний ажлаа хийнэ” хэмээж байсан. Харин одоо сайд нарыг арван хэдээр солих дээрээ тулаад байгаа юм. Харин Л.Оюун-Эрдэнийн хань болгож авч үлдэх давхар дээлтэй сайд нараас Хууль зүй, дотоод хэргийн сайд Х.Нямбаатар, Сангийн сайд Б.Жавхлан, Боловсролын сайд Л.Энх-Амгалан нарын нэр дурдагдаж буй. Бүр Х.Нямбаатарыг ЗГХЭГ-ын дарга, Цахим хөгжил, харилцаа холбооны сайдаар Н.Учралыг томилно гэх таамаг, яриа бий. Гэхдээ олны үг ортой гэдэг шиг төрийн ордноор нисдэг "бор шувуунууд" үнэн байх нь ч бий. Үнэхээр  хамгийн олон жил ажилласан гишүүдийг сайд болгох юм бол М.Оюунчимэг, Д.Сарангэрэл, Ж.Мөнхбат тэргүүтэй хэсэг хүн сайдын суудалд залрах эрх мэдлээ тэсэн ядан хүлээж суухаасаа илүү хийх ажлаа хүлээж, хариуцлагатай байгаасай билээ.