“Хүүхэд маань утас оролдоод салахаа байлаа”, “Утсаар тоглохыг нь болиулж, яаж ном уншуулдаг болгох вэ” гэхчлэн арга хайж, хүүхдээ ухаалаг төхөөрөмжөөс салгаж, номд дуртай, ном уншдаг болгохыг зорьж байгаа эцэг, эх олон болжээ. Гэсэн ч хүүхдийнхээ ирээдүйг бодон ном уншуулж, номд дуртай болгоё гэсэн эцэг, эхчүүдэд “хэрхэн” гэх асуулт гарч ирдэг. Зарим эцэг, эх уг асуултын хэдийнэ олсон болов уу. Харин та олоогүй бол танд хүүхдээ номд хайртай болгох найман энгийн аргыг хүүхдийн зохиолч зөвлөж байна.

Эргэлт.мн мэдээллийн сайт “Оюунт Монгол” буландаа хүүхдийн уран бүтээлийн "Марчаахай" студийн зохиолч, редактор Б.Батцэцэгийг урьж, оролцууллаа. Тэрбээр хүүхдийг номд хайртай болгох найман аргыг эцэг, эхчүүдэд зөвлөсөн билээ.

1.НОМ СОНГОХДОО ХҮҮХДИЙНХЭЭ САНАЛ, БОДЛЫГ СОНСОХ

            Зарим аав, ээж хүүхэд бүр өөр сонирхол, уншлагын түвшинтэйг мартаж, тэдний өмнөөс сонголт хийдэг. Гэсэн ч үүнээс нь болоод хүүхдийн хүсэл, тэмүүлэл буурах тохиолдол бий. Ном нь хүүхэд хүнддээд, нэг бол өөрийнх нь сонирхдоггүй сэдвийнх байдаг. Тиймээс хүүхдэдээ ном сонгохдоо санал, бодлыг нь хүндэтгэж байгаарай.

2.ХҮҮХДИЙН ГАР ХҮРЭХЭЭР НАМХАН ТАВИУРТАЙ НОМЫН БУЛАН ГАРГАЖ ӨГӨХ

               Хэрэв хүүхдийн гар хүрэхээргүй өндөр номын сан байвал номын сан бус ердөө үзмэр болно. Тиймээс хүүхдээ багаас нь ном уншуулж, ном дуртай болгомоор байвал хүүхдийнхээ гарыг хүрэхээс номын сантай болж, нүдэнд нь харагдах газарт тавьж байгаарай. Нэг л мэдэхэд хүүхэд тань номын хуудас эргүүлээд сууж байх болно.

3.ААВ, ЭЭЖИЙН ҮЛГЭРЛЭЛ

Хүүхэд аав, ээжийгээ дуурайдгийг хүн бүр мэднэ. Хэрэв таныг ном уншиж, номд шимтэж байгааг харвал хүүхэд тань ч номд татагддаг гэдгийг санаж яваарай.

4.НОМ УНШИХ ТОГТСОН ЦАГ ГАРГАХ, ЯРИЛЦАХ

Өглөө, өдөр, орой өдрийн аль цагт болов 10-20 минутын ном уншлагын тогтмол цаг гаргах нь чухал нөлөө үзүүлдэг. Түүнчлэн бага насны хүүхэдтэйгээ номоо хамт уншиж, номынхоо талаар ярилцах нь хүүхэд урам зориг өгч, хүсэл тэмүүлэл төрүүлнэ.

5.НОМ УНШИХЫГ ШАХАЖ, ШААРДАХГҮЙ БАЙХ

“Ном унш”, “Номоо уншиж дуусга”, “Наад номоо уншаад ойлгосон уу” гэх зэргээр хүүхдээ хэтэрхий шахаж, шаардах нь хүүхдээ номд дуртай болгох бус эсрэгээрээ хүүхдэд дарамт болж хувирдаг.

6.ТАВ ТУХТАЙ ОРЧИН БҮРДҮҮЛЭХ

Чимээ шуугиантай, тухгүй орчинд хүүхэд гэлтгүй том хүн ч “Ном уншъя” гээд уншиж чадахгүй, тогтож сууж чадахгүй байх үе олон. Тиймээс хүүхдэдээ ном унших тухтай орчин бүрдүүлж өгөөрэй.

7.НОМЫН САН, ДЭЛГҮҮР, НОМЫН ӨДӨРЛӨГӨӨР ДАГУУЛЖ ЯВАХ

Хүүхэдтэйгээ хамт номын сан, дэлгүүрээс орж, бүхий л төрлийн номын өдөрлөг, номтой холбоотой арга хэмжээнд хамт орох нь хүүхдээ номд дурлуулах шилдэг аргуудын нэг.

8.АЛЬ БОЛОХ НОМ БЭЛЭГЛЭХИЙГ ЗОРИХ

Хүүхдийнхээ төрсөн өдөр, шинэ жил, цагаан сар зэрэг тэмдэглэлт баяраар хүүхдийнхээ бэлгэнд аль болох ном багтаахыг хичээгээрэй.