ДАВТАГДАШГҮЙ МЭДРЭМЖ

2025-10-14, 117

Түүнд нэг тийм давтагдашгүй мэдрэмж, мөн имиж бий. Хаана ч дуу нь эгшиглэсэн хэн бүхэн Б.Маралжингоогоо андахгүй. Нүдээ аниад, дуундаа бүрэн орж дуулж буй нь дуунаас нь мэдрэгддэг. Тун энгийнээр хэлэх юм бол өвөрмөц хоолойтой, өөр ертөнцтэй дуучдын нэг бол гарцаагүй тэр. Тэгвэл тун удахгүй үзэгчдэдээ тоглолтоо хүргэхээр бэлдэж байгаа аж. Хайрын зөөлөн, торгон нарийн мэдрэмжтэй дуунуудтай нэгэн гал ассан үдшийг үзэгчид зорих нь.

Түүнийг дуулахад 17 насандаа эргэн нэг очиж, өөрийнхөө ертөнцийг зүүдийг үзэж, ирэх учралыг хүлээж, "Би нисэж байна" гэж төсөөлөхийн зэрэгцээ танихгүй нэгэн хайртай учирч, "Хайраа надад мэдрүүлээч" гэж хэн нэгэнд аяархан шивнэх шиг. Олон сайхан жүжиг, киноны дууг ч тэр хамтран дуулсан.

"Үл таних өдрүүдийг өөрийнхөөрөө би туулна аа

Өчигдөр орсон борооны сүүлчийн дусалд ургана аа

Амьсгалж байна, урсаж байна амьдрал гэгээтэй

Алтан нарны туяа жаргал даллан амжиж над дээр туслаа..." гээд "Зэрлэг цэцэгсийн хүлэмж" киноны дуу түүний хоолойтойгоор эгшиглэнэ.

Тэрбээр 2008 онд 10 дуутай "Миний ертөнцийн зүүд" цомог гаргасан. Харин 2016 онд "Яг түүн шиг" шоу нэвтрүүлгийн анхны улиралд оролцож хоёр дугаар болон хагас финалд ялагч болж байв. Дараа нь 2017 онд өөрийн бие даасан анхны тоглолтоо хийсэн бөгөөд төсөөлж байснаас нь олон хүн цугласан гэдэг. Б.Маралжингоо чадалтай хүчирхэг холойгоороо олон танигдсан бөгөөд "Чамайгаа алдмааргүй байна" дуунд Номинжин болон Хаянаатай хамтарч дуулахдаа 16-хан настай байжээ. Мөн 17 насандаа "17 нас" дуугаа гаргасан байдаг байна.

Түүнд гэр бүлийн хүмүүжил их нөлөөлсөн байна. Энэ тухай өөрөө "Багаасаа л Шуберт, Дебюсси, Шопений сонгодог ая сонсох дуртай хүүхэд байлаа. Нөгөө талаас аав минь “AC DC”, “Pink Floyd”, “Radiohead”, “Deep purple” зэрэг хамгийн топ хамтлагуудыг сонсоно. Ухаан орсон цагаасаа л аав ээжтэйгээ сонссон дуу, үзсэн киноныхоо тухай ярьж, үзэл бодлоо чөлөөтэй илэрхийлдэг байсан минь дуучин болоход их түлхэц болсон болов уу. Манай аавын урлагийн талаарх төсөөллүүд нь чимхлүүр хэрнээ их уран. Төсөөллийн тухай яриа нь миний сэтгэлийг их хөдөлгөдөг л дөө. Өссөн орчин минь тийм болохоор урлаг, уран бүтээлийг шимж, мэдэрч хийх дуртай. Дуу хөгжим бол миний сонирхлыг хамгийн ихээр татдаг, амьдрал минь чухал хэсэг" хэмээн ярьсан байдаг. Түүнд удахгүй болох "Lucid dream” хоёр дахь бие даасан тоглолтод нь амжилт хүсье.

ДАВТАГДАШГҮЙ МЭДРЭМЖ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.