Олимпын мөнгөн медальт Б.Баасанхүү өөрийн цахим хуудастаа “Хүний хөдөлмөрийг яасан сайхан үнэлдэг юм бэ. Хөвсгөлийн нутгийн зөвлөл минь надад нэг батламж л өгсөн дөө. Олимпоос медаль аваад баахан батламжтай боллоо” хэмээн бичиж, олон хүнийг талцуулсан. Хөвсгөл аймгийн нутгийн зөвлөлийн Нарийн бичгийн ажилтнаас дээрх асуудлын талаар тодрууллаа.

ХӨВСГӨЛ АЙМГИЙН НУТГИЙН ЗӨВЛӨЛ: Б.БААСАНХҮҮД 2026 ОНД АШИГЛАЛТАД ОРОХ ОРОН СУУЦНЫ БАТЛАМЖ ОЛГОСОН

      Тэрбээр “Манай зөвлөл төрийн байгууллага биш. Улаанбаатар хотод амьдардаг Хөвсгөл аймгаас гаралтай иргэд сайн дураараа нэгдэн нийлж, аливаа төсөв санхүүг гаргаж, үйл ажиллагаандаа зарцуулдаг. Манай зөвлөлийнхөн Б.Баасанхүүг олимпоос медаль аваад ирэхэд нь баярлаж, хүн тус бүр мөнгө өгч байснаас бодит зүйл бэлэглэе хэмээн ярилцаж, 2026 онд ашиглалтад орох орон сууцны батламж олгож байсан. Одоогоор бид тухайн орон сууцны төлбөрийг төлөөд явж байгаа. Уг нь энэхүү асуудлыг Б.Баасанхүү мэдэж байгаа. Улсын мөнгөөр түүнд орон сууц авч өгнө гэж амлаагүй учир зарим нь мөнгөтэй мөнгөгүй үе таарч байгаа. Бид ч мөнгө өгнө гэж амласан хүмүүсээс тухайн бүрд нь нэхэж, шаардаж байгаа. Бэлгийн морины шүдийг бүү үз гэдэг үг байдаг. Одоогийн байдлаар мөнгө өгнө гэж амласан хүмүүс 50 хувьд хүрээгүй байгаа нь удааширлыг бий болгож байгаа. Уг нь бид сайн санааны үүднээс буюу нутгийн охин олимпоос медаль аваад ирлээ хэмээн баярлаж, дээрх үйл ажиллагааг зохион байгуулсан юм” гэлээ. Хөвсгөл аймгийн нутгийн зөвлөл нь албан ёсны долоон хүний бүрэлдэхүүнтэй үйл ажиллагаагаа явуулдаг аж. Тус зөвлөлийн даргаар Ц.Цэцэнзориг ажилладаг аж.

ХӨВСГӨЛ АЙМГИЙН ТАМГЫН ГАЗАР: Б.БААСАНХҮҮГ ААВ, ЭЭЖТЭЙ НЬ ХАМТ ХҮЛЭЭЖ АВАХДАА ХОЁР ӨРӨӨ БАЙРНЫ ТҮЛХҮҮР ӨГСӨН

        Мөн Хөвсгөл аймгийн Засаг даргын Тамгын газрын даргаас олимпын медальт Б.Баасанхүүд амласан бэлгээ өгсөн эсэх талаар асуухад “Хөвсгөл аймгийн Тамгын газраас Б.Баасанхүүг аав, ээжтэй нь хамт хүлээж авахдаа хоёр өрөө орон сууцны түлхүүрийг нь гардуулж өгсөн. Тийм учраас Тамгын газрын зүгээс Б.Баасанхүүд өгөх ёстой бэлгээ тухайн үед нь гардуулсан” гэв.

ОЛИМПЫН МӨНГӨН МЕДАЛЬТ Б.БААСАНХҮҮГИЙН АМЖИЛТЫГ МЯЛААЖ БАЙСАН ХҮМҮҮС

-“Макс групп”-ын Ерөнхийлөгч Д.Ганбаатар тэргүүтэй удирдлагууд хүлээн авч, 50 мянган ам.доллар бэлэглэв.

-Тод манлай уяач П.Энхтөр өөрийн уяан дээрээ хүлээн авч, азарга адуу өгч байв.

-МҮОХ-ны Ерөнхийлөгч Б.Баттүшиг Б.Баасанхүүг дасгалжуулагч М.Бундмаагийн хамт хүлээн авч, 100 сая төгрөг, хоёр алтан дугаар бэлэглэж байв.

-Хөвсгөл аймгийн удирдлагууд хүлээн авч, аймгийн төв дэх “Мөрөн вилла” хотхонд хоёр өрөө байр олгож байв.

-Монгол Улсын засгийн газраас гурван өрөө байр бэлэглэж, батламж олгож байв.

-Хөвсгөл аймгийн нутгийн зөвлөлөөс хоёр өрөө байр бэлэглэж, батламж олгож байв.