"Сант" сургуулийн 12 дугаар ангийн сурагч Б.Дөлгөөнхэрлэн олон улсын англи хэлний олимпиадад амжилттай оролцож, 93,75 оноогоор тэргүүлж, алтан медалийн эзэн болсон билээ. Түүнтэй ярилцсанаа хүргэж байна.

-Чамд энэ өдрийн мэнд хүргэе. Англи хэлний олон улсын олимпиадаас алтан медаль хүртсэнд баяр хүргэе. Сэтгэгдлээсээ хуваалцахгүй юу?

                -Баярлалаа. Энэ олимпиадад оролцох нь надад маш том сорилт байлаа. Гэхдээ өөрийн хүчээ шалгах, олон орны сурагчидтай өрсөлдөх сайхан боломж байсан. Алтан медаль хүртэж, аварга болсон мөчдөө бүх хөдөлмөр минь үр дүнгээ өглөө гэж бодож, баярласан даа.

-Тус олимпиадад хэр удаан бэлдсэн бэ. Юу нь дээр нь хамгийн их анхаарч бэлдэв?

                -Би найз н.Алтангэрэлтэйгээ хамт сарын хугацаанд бэлдсэн. Голчлон дүрмийн нарийн ялгаа болон өгүүлбэрийн бүтцийг сайжруулах дээр анхаарсан. Манай сургууль ч дүрмийн сургалтдаа их анхаардаг болохоор энэ тал дээр давуу гарсан л даа.

-Олон улсын олимпиадад өмнө нь оролцож байв уу. Хамгийн хэцүү даалгавар нь юу байсан бэ. Яагаад хэцүү байв?

                -Өмнө нь ийм том хэмжээний олон улсын тэмцээнд оролцож байгаагүй ээ, шинэ туршлага байлаа. Хамгийн хэцүү нь унших хэсгийн даалгавар байсан. Учир нь, урьд өмнө үзэж байгаагүй төрлийн текстүүд олон байсан учраас бөгөөд цагийн менежмент тун чухал байлаа.

-Энэ олимпиадад оролцоод юуг сурч авсан бэ. Ямар чадвараа илүү сайжруулах ёстой юм байна гэж бодсон бэ?

                -Би өөрөөсөө илүү чадвартай, шаргуу сурагч олон байдгийг ойлгосон. “There are always bigger fish” гэдгийг мэдэрсэн. Тиймээс ярианы ур чадвараа илүү хөгжүүлэх хэрэгтэй гэж бодсон.

-Олон хичээл байгаа шүү дээ. Тэр дундаас англи хэлийг гүнзгийрүүлэн судлах болсон шалтгаан бий юу. Юу нь чиний сонирхлыг татсан юм бэ?

                - Би багаасаа кино, цуврал үзэх дуртай байсан. Тэрнээсээ үг, хэллэг сурч, англи хэлд улам дуртай болсон. Англи хэлээр ярьж, өөрийгөө илэрхийлж чадна гэдэг надад эрх чөлөө өгдөг юм шиг санагддаг.

-Англи хэл сурахын тулд юу дээр нь хамгийн их анхаарах хэрэгтэй юм шиг санагддаг вэ. Чиний хувьд?

                -Миний бодлоор дүрэм болон өгүүлбэрийн зөв бүтэц хамгийн чухал. Хэдийгээр би англи хэлний суурь мэдлэггүй байсан ч сургууль маань сайн багш нартай байсан учраас өдий зэрэгтэй байж энэ хэлийг сурсан гэж боддог.

-Тэмцээнд оролцоход нь багш нар болон гэр бүлийнхэн нь их тусалсан байх. Тэд чамайг хэрхэн дэмждэг вэ?

                -Манай сургуулийн англи хэлний багш нар маш их тусалсан. Тэд маань бидэнд зөв материал өгч, алдааг маань нарийн засаж өгдөг. Гэр бүлийнхэн маань ч үргэлж итгэж, урам өгч байсан нь хамгийн том дэмжлэг байсан.

-Англи хэл сурснаар, энэ олимпиадад бэлдсэнээр чамд ямар эерэг өөрчлөлтүүд гарсан бэ?

                -Өөртөө итгэлтэй болсон. Өмнө нь айж байсан зүйлсээ туршиж үзэх зоригтой болсон. Мөн хамтын ажиллагаа, хариуцлага гэдгийг илүү ойлгосон.

-Англи хэлээс гадна сурахыг хүссэн, сурч байгаа хэл бий юу. Яагаад?

                -Япон хэл сурах сонирхолтой. Тэндхийн соёл, хүмүүжил, хөдөлмөрч зан чанар нь намайг их татдаг.

-Төгсөх ангийн сурагч юм билээ. Ямар мэргэжилтэй болохыг зорьж байгаа вэ?

                -Олон улсын бизнес, менежментийн чиглэлээр сурахыг хүсэж байгаа. Англи хэлний мэдлэг маань надад гадаад орчинд сурахад их тус болно гэж боддог.

-Дараагийн зорилго, мөрөөдлийнхөө талаар ярихгүй юу?

                -Олон улсын их сургуульд тэтгэлэгтэйгээр суралцаж, Монголдоо буцаж ирээд шинэ санаа, шинэ боломжуудыг бий болгохыг хүсэж байна.