НАСА агентлаг 140 жилийн хугацаанд дэлхийн уур амьсгал хэрхэн өөрчлөгдөж буйг бичлэгээр үзүүлжээ. Энэхүү бичлэгт дэлхий жил ирэх тусам халуун болж буйг үзүүлсэн бөгөөд 2016-2020 онд хамгийн халуун жилүүд өнгөрсөн байна. НАСА-гийн судалгаагаар дэлхийн хамгийн халуун жил 2016 онд тохиосон хэмээн үзэж байсан ч 2020 он энэхүү дулааны хэмжээг давжээ.

“Өдөр ирэх тусам дэлхийн дулаарлын талаар улам бүр муу мэдээ сонсож буй нь “Бид юу хийх ёстой вэ” гэдгийг бодох цаг болсныг харуулж байна” хэмээн НАСА мэдээлсэн байна.

Уг судалгаанд 2020 оны температурыг 1951-1980 оны дундаж температуртай харьцуулахад 1.02 цельсээр нэмэгдсэн байна. Өдөр ирэх бүр дэлхий дулаарч байгаа нь хүний буруутай үйл ажиллагаанаас үүдэн хүлэмжийн хий нэмэгдэж буйтай холбоотой аж.

НАСА-гийн хэвлэл мэдээлэл, GISS-ийн захирал Гевин Шмидт “Өнгөрсөн долоон жил дэлхийн дулаарал улам бүр нэмэгдэж буй бөгөөд хамгийн халуун жил 2020 онд тохиолоо. 2020 он хамгийн дулаан жил байх нь чухал бус энэ дулаарал олон жилийн чиг хандлага болж буй нь асуудал юм. Уур амьсгал өөрчлөгдөхийн хэрээр энэ дулаан нэмэгдэх вий хэмээн санаа зовж байна” хэмээжээ.

Дэлхий улам халуун болох тусам далайн мөс массаа алдах, далайн түвшин нэмэгдэх, байгалийн гамшиг дагуулах зэрэг олон сөрөг нөлөөтэй аж.

Эх сурвалж:Boredpanda