АНУ-д өнгөрсөн арванхоёрдугаар сард 140 мянган ажлын байр цомхотгосон бөгөөд үүнд эмэгтэйчүүд илүү өртжээ. 2020 оны эхэнд ажлын байрны 50.03 хувийг эмэгтэйчүүд эзэлж байсан бол оны төгсгөлд 860 мянган эмэгтэй ажилгүй болсон байна.

2009-2010 онд гурван сарын хугацаанд АНУ-ын түүхэнд эмэгтэйчүүдийн ажил эрхлэлтийн түвшин эрэгтэйчүүдийн тоог давж, хамгийн дээд цэгтээ хүрч байжээ. Гэвч мэдээж жендерийн тал дээр ялгаатай зүйлс байсаар байв. Эмэгтэйчүүд цагийн ажилд илүү хамрагдаж, эрэгтэйчүүдээс бага цалин авахаас гадна гэр бүлийн хариуцлага хүлээж ирсэн. Гэвч өдрөөс өдөрт эмэгтэйчүүдийн ажил эрхлэлт дээрдэж байсан ч цар тахлын улмаас дордсон үзүүлэлт гарчээ.

Өнгөрсөн баасан гарагт хийсэн судалгаагаар цар тахлаас үүдэн тус улсын эдийн засаг уналтад орж, нэг сарын дотор 140 мянган ажлын байр цомхотгосон талаар мэдээлсэн байна. Уг судалгаагаар жендерийн цочирдом дүн гарсан бөгөөд 156 мянган эмэгтэй, 16 мянган эрэгтэй ажилгүй болжээ.

Цар тахал гарснаас хойш буюу өнгөрсөн хоёрдугаар сараас хойш 5.4 сая эмэгтэй, 4.4 сая эрэгтэй ажлын байрны цомхотголд өртсөн байна. 

Харин өрх бүрд явуулсан судалгаанд бүр дор үзүүлэлт гарсан бөгөөд арванхоёрдугаар сард латин болон өнгөт арьстнууд олноор ажилгүйдэлд өртсөн бол цагаан арьст эмэгтэйчүүд харьцангуй орлоготой байсан үзүүлэлт гарчээ. Энэхүү судалгаанаас үзвэл, өнгөрсөн он эмэгтэйчүүд, тэр дундаа өнгөт арьстан эмэгтэйчүүдэд ээлгүй жил байсан аж. Эмэгтэйчүүдийн ажилгүйдлийг түвшингөөр нь үзвэл, латин эмэгтэйчүүд 9.1 буюу хамгийн их, өнгөт арьстан эмэгтэйчүүд 8.4, цагаан арьст эмэгтэйчүүд хамгийн бага буюу 5.7 хувиар ихэссэн судалгаа гарсан байна.