Өнгөрсөн нэгдүгээр сарын 17-ны өдөр Алексей Навальныйг эх орондоо ирэхэд баривчилсанд бухимдсан олон мянган хүн ОХУ-ын өнцөг булан бүрт эсэргүүцлээ илэрхийлсэн юм. Түүнийг шоронд орсноос хоёр өдрийн дараа Алексей Навальный гэх ютүб хуудсанд "Путиний ордон" хэмээн баримтат кино цацагдсан даруйд олон хүнд хүрч, жагсаал газар авахад нөлөөлсөн юм.

Ийнхүү нэгдүгээр сарын 23-ны өдөр ОХУ-ын өнцөг булан бүрт мянга мянган хүн жагсаж, гурван мянга гаруй хүнийг баривчлаад байв. Жагсаалын үеэр цагдаа нар эсэргүүцэгчдэд хүч хэрэглэж буй зураг, бичлэг ихээр цацагдсан юм.

Үүнээс долоо хоногийн дараа Навалыйг дэмжигчид ахин жагссан бөгөөд энэ удаагийн жагсаалд өмнөх жагсаалаас олон мянган хүн оролцож, 5000 гаруй хүнийг баривчилсан юм. Мөн ОХУ-ын Ерөнхийлөгч Путин "Баримтат кинон дээр дурдсан 1.3 тэрбум ам.долларын ордон минийх биш" хэмээн мэдээлсэн. Энэхүү явдлын дараа Москвагийн шүүх Алексей Навальныйн 3.5 жилийн тэнсэн харгалзах ялыг 2.8 жилийн хорих ял болгосон юм.

Гэвч энэхүү явдлын дараа ч хүмүүс тэмцсээр байна. ОХУ-д өнгөрсөн ням гарагт Навальныйг дэмжигчид гэрэл асааж, эсэргүүцлээ илэрхийлжээ. Энэхүү тайван жагсаалын үед ямар нэгэн хууль зөрчсөн үйлдэл гараагүй байна. "Хайр айдсаас хүчтэй" хэмээн хаштаг ашиглан гар чийдэн, лаатай зургаа хүмүүс цахим ертөнцөд оруулж үзэл бодлоо илэрхийлжээ.

Уржигдар буюу энэ сарын 15-ны өдөр коронавирустэй тэмцэж буй эмч хамгаалалтын хувцсаа өмсөж, утасны гэрлээ асаан Навалныйг дэмжиж буйгаа илэрхийлсний төлөө түүнийг ажлаас нь халжээ.Тэрбээр олон нийттэй адил үзэл бодлоо илэрхийлсэн боловч ажлаас нь халсан байна. Эмч Сулаймонов "Би аюултай бүсэд ажилладаг болохоор гадаа зураг авах боломжгүй байсан болохоор эмнэлэгт Навальныйг дэмжиж буйгаа илэрхийлэхээр шийдсэн" гэжээ. Ийнхүү Навалньныйг 2.8 жил хорих ял оноосон ч хүмүүс эсэргүүцлээ илэрхийлсээр байна.