Хоёрдугаар сарын 1-нд удирдагч Аун Сан Су Чиг хорьж, цэргийн хүчнийхэн төрийн эргэлт хийсэнд Мьянмарын иргэд эсэргүүцлээ илэрхийлж, даваа гарагаас хойш жагсаж байна.

Цэргийнхэн зарим газар хязгаарлалт тогтоож, жагсаал хийхийг хориглосон ч мянга мянган иргэд эсэргүүцэн жагссаар  байгаа аж. Тэд "Хунтагийн цэргийн хүчин унах болтугай", "Хэрэв тэр ялагдвал цаазын ял, бид ялагдвал боолчлол", "Энэ огт тэмцэж дуусах тэмцэл биш. Эцсээ хүртэл тэмцэх тэмцэл" гэсэн лоозонгууд хаджээ.

Харин улс төрийн эрх мэдлийг авсан Мин Аун Хлаинг анх удаа телевизээр мэдэгдэл хийсэн бөгөөд "Парламентын сонгуульд Аун Сан Су Чигийн нам хууль бусаар үнэмлэхүй ялалт авсан" гэж мэдээлжээ. Харин генералын энэ үгэнд дургүйцсэн олон нийт цахим сүлжээнд бухимдлаа илэрхийлсээр байна.

Мин Аун Хлаинг сонгуулийг ахин явуулж, ялагчдаа эрх мэдлээ өгөхөө хэлсэн төдийгүй дахин сонгуулийг түүний "шинэчлэгдсэн" сонгуулийн хороо зохион байгуулна гэв.

АНУ-ын төрийн ордноос хатагтай Аун Сан Су Читэй уулзах хүсэлт тавьсан ч цэргийн хүчнийхэн эсэргүүцжээ. АНУ Мьянмарт  жагсаж буй олны талд зогсоно гэдгээ илэрхийлээд байна.